5 décembre , 2021

Min yeɛna web yessullsen?

@iPshel

di lwesst n lherd x yiger n technology. Yenna-yi ijjen, ij n useqsi, yeqqim itenned-ayi deg uzellif. Inna‑dd: ttegged cwayt n “Deep web”?.

“Deep web” niɣ web‑yullɣen aṭṭas it‑ittxellaten aked web‑yessullssen “Dark web”. Nitni d tnayen leḥwayej msebḍan munen di tecti. Ḥima a nebḍa jer‑asen. Ad newc ij n umeḍya:

Lerifian.fr aqqet di web‑nurmal. Izemmer ijj zi ṭṭerf ad t-yadef  ad iẓer min dag-s. Amcnaw mamek zemmaren imulluɣen “Inni yettmulluɣen[1]” (Crawlers). Imulluɣen-a mani mma tella ca n tefrayt di web nurmal, ssnen‑tet. Melmi mma tbaned ca n icten d jjdid. Ad xaf-s rzun. S degga marra, web nurmal izemmer ijj zi ṭṭerf ad ɣer‑s yadef. Degga ittawi‑aneɣ ɣer web‑yullɣen d weni yessullsen.

Web‑yullɣen. Imsebḍa x weni nurmal deg ij n ḥajet. Wer izemmer ijjen zi ṭṭerf a ɣer‑sen yaweḍ. Ifututen‑nni deg uklawd, (iCloud, niɣ Google Photos). Yudef deg-s ula d lehwayej i ɣer yewdan di Google Drive, yellan wer izemmer ḥed bla bab‑nsent a ɣer‑sent yaweḍ. Deep web yudef dag-s ula d Data n midden. Data n imehlak di seppiṭarat. Data n ccarakat i ittilint nnufrent. Ura d e-mails aqqa‑ten di web‑yullɣen.

Maca xmi idd‑ɣa‑nas ɣer web‑yessullsen, Tbarda ttneqlab. Dark web wer zemmren a ɣer-s awḍen imulluɣen-nni niɣ d iwdan zi ṭṭerf. Issiten yellan di web yessullsen yeqseḥ ad ten‑tesned. Yeqseḥ ad ɣer-sen tawḍed. Isiten iyellan ssullsen wer tkemmilen ca s “.com” niɣ “.net” niɣ ca nneɣni. Isiten yessullsen tkemmalen s “.onion”. Ttraḥen zeg ufus ɣer ufus. Iqseḥ ijjen zi ṭṭerf a ɣer-sen yadef. Minzi tteḥwajan ij n uprugram spisyal i itejjan wi yexsen a ɣer-s tili tzemmer ad iẓer min deg-sen deg isiten yessullsen.

Web‑yessullsen netta ggint iwdan ḥima ad jjen weni it‑issxeddamen wer itwassan ɣer ḥed. Ggin‑t ḥima ad tilid tennufred zeg yenni iḥettan deg web nurman. Ggin‑t ḥima a din ilin inni ixeddmen deg ujurnal , d imeɣnas deg iger n tlelli. Web issullsen itejja-ten ad ssiwḍen lxedmet niɣ iɣuyyan‑nsen i marra dunnyit, bla ma ggʷden ad ttwaṭṭfen.

Web yessullsen ittwaxdem s ij n lxedmet tejja‑t ad yejj weni it‑isxeddamen yennuffer. Degga wer t‑yejji ca ad yili ittwasexdam di min yecnan waha. Tnuffra‑nni i deg-s, tejja inni ɣer tella nniyet d taɛeffant ad t‑sxedmen ra d nitni. Suyenni, udem n web yessullsen wessxen‑t. Idwel dag-s uzenzi n ddruga s yeklusa‑nnes marra. Azenzi n yegmanen (Organ) n yewdan. D marra min izemmer bnadem a deg-s ixaress.

Urid web yessullsen waha i ttuɣa yellan d ij n lḥajet d tasebḥant di beddu-ness. I dewlen d ca wer yeḥli. Netta d ijj zeg waṭṭas n tmeslayin yecnan i ggin yewdan, maca dayɛen‑tent yewdan‑nneɣni.


[1] Imuturen n tarezzut, Amcnaw Google d Bing d Yandexx, γer‑sen can arrubut lxedmet‑nsen ad rzun deg web tt‘arcifan marra min zemmern ad γer-s awḍen.

Ilyahoo Proshel
Azul. Qqanayi lyahu!

Amaynu

Yeqqen ɣer-s