22 mai , 2021

Metaverse – Safi niweḍ tiwecca-nni n digital?!

« Metaverse d aṭewwar n tɣuni n wamunen » ammu i dd-yusa x usit n Meta-universe. S lemnaḍar n VR, lemnaḍar yecḍarn « Smart Glasses », ataf zemmarn yewdan ad adfen amaḍal n Metavers, ad qqimem aked yewdan, akid-sen carken tudert, bla ma msagarn deg ij n wemkan! Maca min daneɣ-ittrajan nican deg umaḍal-a n Meta?!

Adaf ɣer umaḍal n Meta, ixessa-s lemnaḍar-VR, maci zi ṭṭerf ɛad.
GettyImages, Nastasic

« Metaverse » d ij n wawal i dd-yekkin zeg ungal « Snow Crash » n Neal Stephenson. deg-s « Meta » d « Universe ». Metaverse yella zi melmi deg waṭṭas n tirarin n ubidyu. Mani zarren imiraren ayawya d imunikuten s lemnaḍar n VR.

09 dujenbir 2021 yessufeɣ-dd Facebook ij n Lirart i xeddmen s VR, qqaren-as Horizon Worlds, (qat ɛad deg USA d Kanada waha). Deg useggʷas-nni beɛda, beddlen isem n firma Facebook ɣer Meta, yewca-dd Mark Zuckerberg lexbar belli qa xeddmen n Metaverse. Firma n Meta ɣer-s deg urasmal Facebook, Instagram, WhatsApp d Oculus, i ittwasnen s ufabrikar n Virtual-Reality-Technologie.

Virtuelle Realität s Lemnaḍar n VR

Maḥend ad tesfehmed ca n ḥedd umi qqarn Metaverse, temsar-as am axmi tessefhamed iwdan deg iseggusa n 80 umi qqarn « internet ». Minzi ɛad wer izemmar ad ixayel ḥedd min yexs ad yegg Mark, d mamek ɣa yexdem. D ma ad ibeddel tibridi n wemsawaḍ-nneɣ deg iseggusa i dd-ɣa-yasen.

Adaf zi tewwart n Metaverse banen lemfataḥ-nnes. Leḥsab di Facebook, d lemnaḍar n VR zi marka n Oculus (n Meta beɛda) i yeggin 500 Uru. Lemnaḍar n VR, ḥejjben tidet d min dd-yennḍen i wi ten-yeggin, wer ten-ikessi ca akid-s ɣer Metaverse. Ɣir a din-yadef, ad yebda ad isennaɛ deg Avatar-nnes (muliku/atcallu), Avatar-a itteg min itteg bab-nnes, itthezza azellif aked unhezgi n lemnaḍar n VR. Metaverse deg-s ula d leḥwayej. Izemmar a ten-iḥada, niɣ a ten-yeksi a ten-yessars. Ssenni, alik i umelqi aked imeddukal, niɣ ixeddamen ad ggen Meeting. Niɣ ad ffɣen ad ssaran, ad « sewwqen » di Metaverse. Ittban-dd Facebook maci txess a daneɣ-tesmun waha, txes ad tezzenz ca n tmealayin Digital, lhawa di lhawa!

.

Min yellan digital?

Metaverse n tidet, s lmeɛna n ca n wemkan, ɛad wer yelli. Maca llant Apps, i ixellqen ij n tidet virtuell, i di zemmarn yewdan (i ittiraren) ad msawalen. Amen yegga Rappur Snoop Dogg i yessidfen lbilla (Villa) nnes di App « the Sandbox ». Lbilla nni uxess ad tt-yerr ssa ɣer zzat i fyictat d tteqsayar.

Arruḍ – ddikur n Piksel

Ra d firmat n warruḍ rezment tiṭṭawin x Metaverse. Arruḍ wer yeqqim ittessar arrimet waha. Yedwel ittekkes amnus n tcuni. Nettexs a zeg-s dd-nban. A nemmel belli ɣer-neɣ, niɣ a nesferḥ ixef-nneɣ. Arruḍ di Metaverse wer yeḥwij bu lkettan. Znuzan i yewdan arruḍ d ipikslen. Arruḍ-a tteggen-ten x ifuṭuten i srursan deg Instagram (am ca n Filter waha).

Wa d beddu waha n usuwweq digital. Arruḍ da yirḍen-ten x yewdan n tidet, niɣ ifuṭuten-nsen. Ẓerren-ten yewdan beɛda. Firmat am H&M, Adidas d Ralph Lauren xellsen lemlayen x ij n tqatcut n tmurt di Metaverse, a din reẓmen tiḥuna a zeg-sent ssaɣen yewdan i Avatar-nsen arruḍ.

As-tesḍeq i Metaverse?

Qqaren qa tudert di Metaverse ad tili am di tidet, a dd-faqent tyacitin. Ad yili nnacat. Maci am tirarin marra n ukumpyuter. Manaya yettbana-dd yecna, maca izemmar ad yerni deg umxumbel di nedder deg wamunen n wemsawaḍ ( Social media) n yiḍa. Imxumbal n ttaɛeddu d useḥqar d Mobbing, deg Metaverse ad dewlen ssagʷaden. Llant tḥuja n waṭṭas n yewdan i xef yekka ttaɛeddu asiksi niɣ d lferz di « Horizon World »

Inni i ibedden x ḥeṭṭu n Data (Privacy), xeẓẓern s ij n lxezrat d taneqsiyt ɣer Metaverse d min deg-s ittawyen. Qqaren Metaverse a daneɣ-yessiweḍ ar dewlen srusan-dd arriklam iqess x yenni t-ɣa-iẓern.  Kṭer zi lḥala di llan wamunen n wemsawaḍ nhar-a.

Majid Aqelɛi
Majid Aqelɛi
Majid, Izran, Tudart tazgzawt, d Tussna...

Ejj akumunṭir

Ari akumunṭir
Ari da isem

Amaynu

Yeqqen ɣer-s