5 décembre , 2021

Twiza n Urifi: Zi lebni n temzyida ɣer lebni n bnadem!

Aṭṭas n Irifiyen lxir iqqen ɣer-sen ɣer tnayen tmaslayin: « tamzyida d imeḍlan ». Mala tennid- as i « lmuḥsin » Arifi ixess-aneɣ minzi ɣa nebna tamzyida niɣ ad tt-neεdel wer dak-tt-itterri deg wudem niɣ mala tennid-as a nseɣ tammurt ad tt-nerr d imeḍlan niɣ a neεdel imeḍlan ad ak-yini ticti akid-k iswiza. Manaya ig ijjin azgen ameqqran n dcurat di Arif dag-sen 20 n yewdan d tlata n tamzyidawin.

Xemmemt kid-i maεlik bnadem Arifi issen ad yegg lxir. Ili aqqa-aneɣ ḥsen zi mindi nella lexxu. Cḥar iseggusa neccin ntettar spitar n uxenzir (cancer) zi ddewla εad aqqa-aneɣ nettraja. Araji-ya yejja aṭṭas n Irifiyen ttmettan minzi wer ɣer-sen minzi ɣa raḥen ɣer Fas niɣ Wejda maḥend ad ggen ccimyu. Suya mayemmi wer netteg spitar-a i yexf-nneɣ? Nec ttwaliɣ wer xaf-neɣ yuεar ca.. Twiza-nni i itteg Arifi xef tmzyida ad tt-yeg x spitar waha.

Spitar d ameknaw (Exemple) waha, dini aṭṭas n tmeslayin ixessa a xaf-sent swizan Irifiyen deg umcan n temzyidawin d imeḍlan. Min xef tuɣa sɣuyyun Irifiyen deg unhezzi n Arif. Nessen ila d lxedmett n ddewla, maca nzemmar a negg cway zi manayenni ra d neccin a nessanqes cwayt n dqqer d ifeqqusen x wuεrur n wayawya d wuεrur n Arif.

Yura-t: Jaouad Labrouzi

Amaynu

Yeqqen ɣer-s