Ijjen wezgen d ameqqran zi tfeqqaɛ i dasen-yemsaren i Irifiyen, uqɛent di char n Kṭuber. Ad d-nfekker ila tagrawla n Arrif def useggas n 1958, tebda di Kṭuber. Tagrawla-ya i yareddej lmexzen bla arreḥmet di beddu n « uzarug », tejja ayezzim di tnefsiyt n Irifiyen s merra. Nettaf aya deg yizlan-nneɣ, tamuzikt-nneɣ…
Kṭuber d char i di ḥeryen Muḥsin Fikri deg uqamyu n wefraḍ, x-as i d-ikker unhezzi n Arrif. Mindi nettedder adu tili-nnes, ar lexxu ɛad. Zi 28 Kṭuber i d-tebda Taṭrajidiyt n Arrif n yiḍ-a aked lmexzen, ula kter awerni umi ittwaḥebbsen kter zi alef n Irifiyen s lmsibbet n unhezzi.
Qbel-nnes, ittwaneɣ Kamal Lḥessani deg Ayt Buɛiyyac, aterras tuɣa irezzu x lxedmet di tmurt-nnes, yuffu-d ittwaneɣ. Mayemmi ? Imeddukal-nnes ar lux ɛad wer ssinen. Mamec di char-a s yixef-nnes i di yemsar weḥmal n yiɣzar x imezdaɣ n Ddriwec. Yiwwi akid-s igelwan n imezdaɣ, yenɣa ca zzag-sen.
Amezruy n Arrif, d amezruy n tareẓẓiwin, imeṭṭawen, taṭrajidiyt… Wah, s tidet necca aɛmud mliḥ, maca waxxa qaɛ wer nelmid zeg umezruy. D wa d afeqqus. Mala neẓra mamec ttemsurrufen Irifiyen awarni i unhezzi n Arrif, ataf a nefhem ila ɛad ixess-aneɣ a nermed mamec ɣa negg a nexdem. Mamec i nzemmar a nili d nnumru yeqseḥ, mac ɣa negg a nweqqer aya d uya waxxa tili nemsebḍa deg uxarres.
D lweqt n lxedmet. Axarres deg yimal, maḥend a nali tsawent, waxxa tuɛar.
