Categories: Timuɣriwin

Iles-nnec mala texsed-t sxedm-it, urid a x-as trud s yiles i t-ineqqen!

Ɛ.Ḥennu

Teqqen tudert n yiles ɣer usexdem-nnes. Cḥal ma isiɣi yiles-a ssexdamen-t yewdan, cḥal ma i x-as neqqar: ɛad deg-s buḥbel.

Tamaziɣt n Arif, ttuɣa-tt wer x-as bu tigg°di, ass umi i ttuɣa tettedder aked ayt bab-nnes ij n tudert tqad. Ttuɣa wer din minzi ɣa tennehwel. Aterras arifi ttuɣa zi dd-ɣa yekker zeg yiḍes, al ɣa yedwel ad yeṭṭes, d netta aked tmaziɣt waha. Ittemsawal zeg-s, ittetter zeg-s lmeɛruf, ittberreḥ zeg-s di leswaq, yeqqar zeg-s izlan, yeqqar zeg-s tiḥuja, ittemzawar zeg-s… Da, nezmer a nessiwel x yij n tudert n tmaziɣt wer din min tt-ɣa yenɣen.

Maca melmi ɣa tebda tutlayt-a ad tennehwel? Ass i di ikumasa wamun (lmujtamaɛ) Arifi ittbeddal, ass i di ikumasa wudem n temdint d min yerbu d tifraz n ubeddel n tudert, ittett udem n ledcur d tqebbal. Tamdint i di llant sekwilat d isinagen d ipulisen d lfusinat, rni x manaya atilibizyun d arraḍyu d sini d umezgun d … Kulci manaya, isaqar-dd ij n wudem n tudert d tamaynut, terẓem-dd abeḥrur-nnes ḥuma ad tesɣumber i uterras arifi, i ttuɣa yennumen aked yij n tudert temsebḍa x ta i di yudef.

Yedwel uterras-a arifi, yeffuk x-as ad yettu iles-nnes, ad yessexdem iles n taɛrabt mala yexs ad iɣer, mala yexs ad iraḥ ɣer lfusina, mala yexs ad iraḥ ɣer ijerdamiyen, mala yexs ad yeɛdu x idiwaniyen… Ula d mala yexs ad isel i arraḍyu d utilibizyun, niɣ ad yeḍfer ca n umezgun niɣ… yeffuk x-as ad yettu iles-nnes Arifi, ad yeḥnunneḍ deg yiles aɛrab.

Manaya, itticc deg uxarres n uterras ij n lqimet i taɛrabt tuɛla x tenni i yellan ɣer tmaziɣt. Minzi tutlayt i ittaf di merra izurag n tdelsa d tussna d ddin d lidarat, wer telli bu am tutlayt i wer t-ineffɛen illa di taddart d ddcer waha.

Tutlayt-a tneffeɛ tarwa-inu, ta lla, neqqeɣ ta sseddariɣ tin!

Tiyemmatin d ibabaten i wer yessinen illa tamaziɣt, dewlen udrusen, ttraḥen qeṭṭan. lexxu qqiment ɣir tyemmatin d ibabaten i yeɣrin, Ina zeg yij uɣezdis, kkin sekwila i yellan d ij n webrid zeg yebriden n wesɛarreb. Zeg uɣezdis nniḍen, ttxarrsen s lmenṭiq n rrbeḥ d txessart aked tutlayt. S lmenṭiq n « mindi ɣa tenfeɛ tutlayt-a tarwa-inu » d « min ɣa ggen tarwa-inu s tutlayt-a »… Minzi ittwala taɛrabt d tefransist, d nitenti d tutlayin i yeṭṭfen merra iraqen, tamaziɣt tenneqbes weḥd-s di tudrin, tedduqma deg iqemmumen i yeqqimen ɛad ṭṭfen deg-s cwayt. Axarres-a, yettwaẓẓu deg walliten n imaziɣen, dewlen qqazen zeg-s amḍel i tutlayt-nsen, sseddaran zeg-s tutlayt wer telli nsen, minzi ttwalan-tt, niɣ ittawey-asen-tt-dd rebbi ad tenfeɛ tarwa-nsen.

Aked uḍuqqez n tmijja n umussu amaziɣ, i ked dd-ḍḍuqqẓen ilaɣiten i ittettren ad ttettwerr taynit i tmaziɣt, dewlen cwayt imaziɣen ttfaqan, dewlen ssnen illa tasertit n wesɛerreb i di tugur ddewla n Lmeɣrib, ad tawi tamnawt i tmaziɣt. S uya, Amussu amaziɣ yemẓeryaḍ-dd s min yeɛlam di jjehd ɣer wazzerg adelsan, amen yegga tizemmar ɛawed ḥuma ad yemmutti ɣer wazzerg asertan. Maca waxxa amenni, umi imeɣnasen n umussu amaziɣ ɣrin di sekwila d taɛrabt, aqqa-ten di ddewla tḥesseb ixf-nnes d taɛrabt, manaya ittejja-ten waxxa ssawalen x tɣawsa-nsen, lebda ssawalen x-as s taɛrabt. Ula di win jer-asen d iles n taɛrabt i ssexdamen, deg yemsagaren d yegrawen d ilaɣiten d tinawin d…

Tedwel tmaziɣt tettmetta, ayt bab-nnes i zeg-s yumnen, neqqen-tt ula d nitni, ttrun x-as. Minzi amen nniɣ, iles mala texsed-t ad yedder, sxedm-it, urid a x-as trud s yiles i t-ineqqen.

Min ixessen bac ad qqimen idammen ttazzlen deg iẓewran n tmaziɣt?

Tutlayt d agla n wegdud, mala ittraja wegdud-a ad yetter tutlayt-nnes s tutlayt nniḍen, zeg yij n ddewla i wer x-as yeḥsiben, aqa tiwecca zik x-as. Nhar-a, ittxessa imaziɣen ad ṭṭfen deg yiles-nsen, ad ssnen illa mala wer t-ssexdimen ittmetta. Rni x manaya, merra minzi i ttuɣa tettmetta tmaziɣt ( Tilibizyun, arraḍyu, sini, ibidyuten, idlisen, tiracciwin n wemsawaḍ anamun, lidarat, timezgidawin…) merra timeslayin-a, ad ilint d timaziɣin. Arifi ad yeqqer lexber s trifit, ad ittfurruj deg ubidyu s trifit, deg ifilmen s trifit, ad yesḥessa i leɣnuj n trifit, ad ittemsawal di lidarat s trifit, ad yessexdam tamaziɣt di tracciwin n wemsawaḍ anamun… S manaya, ittɣima yiles lebda yedder, netticc-as jjehd i ttuɣa das-yettwakksen.

Mala yiweḍ a namen s tutlayt-nneɣ, lexdenni wer yelli minzi daneɣ-t-ɣa kksen zeg iqemmumen illa mala nɣin-aneɣ. Maca mala newca deg-s ifassen, lexdenna nettjeyyaf ixf-nneɣ nnit, qbel ma a daneɣ ineɣ ḥedd nniḍen. Minzi tutlayt temsar-as am buḥbel n wegdud, nnhar i di ɣa traḥ tutlayt, ittɣima wegdud bla buḥbel, lexdenni ideḥḥa am ca n tḥimart wi dd-ɣa yekken a tt-yeẓẓuɣɣer.

Ɛebdelwaḥed Ḥennu

S tira.. iles yeccat iẓewran...

ejj Comment

Amaynu

Tanfust n rebεa zi Ayt Weryaɣel

Milouda El Hankari Tessufeɣ-itt-dd, tɛawed-as tira: Milouda El Hankari  ksiɣ-dd tanfust-a zeg udlis n A.…

24 janvier 2021

Am wass-a 34 issegusa zeg wami nɣin Saɛid d Farid di llisi n Imzuren

Saɛid Buḍḍuft d Farid Akruḥ Deg useggas n tɣuri 86/87 umi ttuɣa imeḥḍaren n llisi…

21 janvier 2021

Ma ad teddred tudert-nnec yecnin mala « temsuluḥed aked lmewt » ?

Tala: BBC Deg iseggusa n xemsin zi lqern yeɛdun, yura umara d useklan amiksiki Octavio…

21 janvier 2021

Min ɣa ggeɣ mala ssneɣ ila iggur ad mteɣ ? « Soul » irezzu x temrarut

Afilm n "Soul" Manis d-ittas buḥbel, mamec ittili, d mani ig iggur ? Ma d ameɣlal…

20 janvier 2021

Biden d aselway n Umarikan d Trump yugi ad yeḥḍer di ficta

Tala: BBC Wwḍen ad ggen Imarikaniyen Joe Biden d amɣar d jjdid x-asen.  Di Washington…

20 janvier 2021

Wami i dd-iccur Useppanyu tamurt n Arif. (Occupation d’Ajdir)

Milouda El Hankari Leḥkayet-a ksiɣ-tt-idd zeg udlis n A. Renisio: “ÉTUDE  SUR LES DIALECTES BERBÉRES…

19 janvier 2021

Asit-a yesxeddam cookies!!

ɣer kṭar