Saɛid Qedduri
Aydud Afalistini yegga ijj n umsagar nneɣni aked umezruy, maḥend ad inin i marra dduniyt aqqa ɛad yedder, ittraja ad yedwel ɣer tmurt-nnes, waxxa ɛdan wussan, waxxa awerni aṭṭas n iwunak n jjihet n MENA, taneggarut-nnsen lmexzen Amuɣrabi, ṭebbɛen ak isuhyuniyyen s wudem d unsib (offeciellement), qqaren-asen i weydud Afilisṭini « ixess-ac ad tqebled s tidet n uḥewwas, ad tsellmed i manaya ».
Yebda umenɣi aneggaru aked yili Asehyun zi Lquds, aked usbeddi n Yisrayiliyen i Iqudsiyen x tẓallit di beddu n arremḍan, ɛawed bdan tteṭṭfen, tɛeddan x Yimselmen n Lquds, ar llilet n 27 n arremḍan, amenɣi idwel di « ddcar n Jerraḥ », Israyiliyen ccaten s lbumat n lgaz, d uqerṭas n plastik… ass n 28 yudef lɛesker ɣer temzgida n Lquds, ttɛeddan x yimselmen, ar mani tudef tnezbayt (résistance) yellan di Ɣezza deg umquṭṭes‑a.
ADAF N TNEZBAYT DEG UMENƔI, ISSEDHEC ISRAYIL, MINZI SXEDMEN DAG‑S IFILISṬINIYIN LESNAḤ D LEBRAQI D JDID, ƐEMMARS WER TEN‑SXEDMEN DEG UMQUṬṬES AKED ISUHYUNIYYEN.
Tirubba n tnezbayt gin ijj n wexxam n temhal (les opérations) i tteggen, ktar zi 2000 n lebraqi hwan-dd x tneddam n uḥewwas, Israyil rrin-dd x Ɣezza s ṭiyarat, teccat tudrin n yewdan, mmuten zag-s aṭṭas n iḥenjiren imeẓẓyanen d temɣarin. ta zeg ij n uɣeẓḍis, zeg uɣeẓḍis-nneɣni, yekker ij n umenɣi di tneddam n uḥewwas.
Israyil tedder ijj n wakkud yeqseḥ, minzi ɣer-s ijj n umenɣi (gerra) ɣer daxel, wer das-teggi bu leḥsab, deg ij n lwaqt hekʷan‑dd x‑as dag‑s lebraqi, waxxa mazal yeqqim uḥewwas yeccat Ɣezza, ɛad tirubba n tnezbayt, ɛad wer dwilent ɣer deffar.
Manaya itewqiɛen, ittic i Ifilistiniyin layas ad kemmlen aḥewwes i ittegg yili asehyuni i tmura‑nsen.
Amezruy Arifi, yura aṭṭas x uḥewwes, ɛawed tamurt-nneɣ terwa s idammen n yemjahden i yemmuten x tlelli. Yesɣer-aneɣ Mulay Muhand i ifehmen mamec tettxarres tampiryalit , yescen-aneɣ belli agdud n dunnyit marra ɣar-sen tɣawsa (lqaḍiyya) d ict, i yellan d tilelli:
» Mani ma yeɣleb uḥewwas di ca n tmurt, d taxessat i neccin, mani mma yettwaɣleb ca n uḥewwas, d arrbaḥ i neccin ». Qqareɣ ammu, minzi xezzareɣ aṭṭas n Irifiyyen‑nneɣ, dewlen ccaten tcamxa i Yisrayil, i ineqqen iḥenjiren imeẓẓyanen, ssawalen x tɣawsa-ya am axmi d asehyun illan d aytbab n tmurt n Filistin, manaya d leɛkes n umezruy d min ɣer yeqqen umaziɣ, minzi Arifi, Amaziɣ tusa‑dd zi tlelli ɛemmers ad yas ak uḥewwas.
