Taziri prod, aqqa-tt ayenni tiweḍ tessujad tettsewwer ijjen tilifilem qqaren-as “Taɣarrabut n Nuḥ”, s wecrak aked waṭṭas n artistat di Arrif. Afilem-a iggur ad t-id-tesseԑda tbadut n Tmaziɣt.
Tilifilem-a iggur ad t-id-issufeɣ Muḥemmed Buzeggu, issawal dag-s x iḥudriyen i wer ixeddmen, ttexsen ad ḥergen x webrid n ikamuyten imeqqranen ɣer berra. Mamec ԑawed iggur ad issreɣ tifawin x “tɣarruba n llilet”.
Buzeggu inna i Nadorcity belli tilifilem-a dag-s “isegbaren d tsegbarin… zi Arrif, dag-sen udmawen d imaynuten dag-sen udmawen-nniḍen i ttuɣa nessen, ttuɣa ttiraren mliḥ wcin liɣillet d tasebḥant di min nesseԑdu d iseddiyen d ifilmawen”.
Afilem-a isrusa-d iseqsan x mamec temsar iwdan zekk°an ɣer berra? Mamec issawal ufilem x tiḥuja-nniḍen qqnent ɣer tameslayt n wetlaԑ. Buzeggu irni inna belli zeg utilifilem-a nxes a zzag-s nemmel belli ɣer-neɣ ca n isseqsan qqnen ɣer iwdan iẓekk°an ɣer berra, d mamec iwdan neṭṭaren ixef-nnsen, zemmren ad mmten niɣ ad nԑeḍben
Aked manaya inna belli nitni itteԑjib-asen ad ssiwlen x “tmeslayin i yeqqnen ɣer yiḍ-a, ɣer imxumbal itteddara wegdud di lweqt-a tanita, s uya i d-yusa ufilem bac ad issiwel x iḥudriyen i d-ittasen manis mma bac ad cebbren deg ikamyuten maḥend ad telԑen”.
Taziri Prod tegga aṭṭas n lexdayem d tisebḥanin, zzag-sen iseddan d itilifilmen i ttuɣa i d-yeԑdun x ttlibizyu n Tmaziɣt deg iseggusa i yeԑdun.
