Tira n Muḥemmed Inɛisa
Di min yeqqnen ɣer ddrama d wemsawal, di ca n texrazin ttuɣa ttaciɣ belli manayenni yuɛɛra aṭṭaṣ. Maca di ca n texrazin nneɣni ccɣer tuɣa-t naqeṣ cwayt. Mara war nniɣ yehwa qaɛ. Lebɛaḍ n yemsawalen yeɣleb x-asen umezgun, tettacid illa tetfurrujed deg umezgun maci di lmuselsel n ttelfaza (Ɛraḥar marra imsawaren n Idir d Kenza). X uɣezdis-nneɣni dinni ca n yemsawalen msaren, tettacid illa axmi imiraren ttrinaran ɛad x ddawr-nsen.
Zi tmesrayin umi rriɣ taynit, ttuɣa ssitimeɣ ad ilinit xir zi mamec tent-ẓriɣ :
– Amina rami i dd-terra lexbar illa Idir d mmi-s, aɣembub-nnes war ibeddel ca aṭṭaṣ, axmi d ca n lexbar yekka yeɛdu waha. Ura d Ṣareḥ lexbar-nni war t-ihezz ca aṭṭaṣ, danita ssawaleɣ x Samira Lmeṣluḥi d Mimun Zanun. Nessen mliḥ tizemmar-nsen timeqqranin di min yeqqnen ɣar ddrama.
– Lfilali d netta i yellan d apilar n Meɣriḍu, marra imeḍfaren tuɣa ttrajan ad ssnen min yeɛna ? Ma n leḥsabat i ɣar-s aked Buyfiran d Ɣancu ? Maca di texrazt taneggarut rami i dd-iban, war dd ibin bu s ca n jjehd i ɣa yejjen ameḍfar ad yaca s jjehd-nni tuɣa ɣar-s di Meɣriḍu amen yekmer.
– Kamira tuɣa tettarjiji aṭṭaṣ di ca n twalatin, waxxa min tuɣa dd-tkessi ibedd (Amecnaw tnayen n yewdan qqimen ssawalen di lbiru), bla ma ssiwleɣ x uqessi izellifen n yinni yessawallen deg waṭṭaṣ imuren. Lfiltrat uṣewwar i twasxedmen di Meɣriḍu ɛejben-ayi s waṭṭaṣ, lmusiqa , lmumettilin… Ɣar uneggaru xseɣ ad iniɣ belli min uriɣ x Meɣriḍu ḥesbem-t d lxezrat n ijj urifi tɛejb-as ijj n tmesract uca yura x-as, minzi dinni aṭṭas n tmesrayin zi min da dd-ssarseɣ izemmar a ɣar-sent yiri mayemmi. War ntettu belli Meɣriḍu itwaṣewwar ijj n wezyen-nnes qber i kuruna, azyen nneɣni di kuruna.
