Tameddit n rḥedd qqimeɣ qibar i lebḥar sḥessiɣ‑as, lemwaj ict tḍeffar‑dd tenneɣnit, ttemẓunfuḍent, iẓẓaryaḍ‑itent‑id usemmiḍ, war ssineɣ mani ittqelliq ad yaweḍ!
Di tallest ttwariɣ 3 n yiḥṛamen, gguren tma tma n lebḥar, miyyzeɣ‑ten illa zeg inni d-ittasen ɣar Nnaḍur, ttexsen ad ẓwan aman… maca war ɣireɣ amenni, ura rexdenni!
Iwḍen d qibar-inu uca bedden ttemsawaren; cwayt arrin s wudem ɣa lebḥar, ɣar uɣaṛṛabu yarsin di rmuyyi; uca bdan ttcuqqen deg waman yimmuzzaren.
Xseɣ ad kkreɣ a ten‑ṭṭfeɣ, ad asen-d-raɣiɣ… maca wer day‑i yessiweḍ yixef-inu!
Xezzareɣ day‑sen ttemqetmaren aked lemwaj, di ṭṭram n tmeddit, d ṭṭram i dasen-iccuren tiṭṭawin… a rami weḍḍren!
Yaaaa Rebbi-inu cek waha yaregben x mayen iqqazen deg wur… cfiɣ iyezzimen… tedr‑dd xafi tigʷda d uxiyyeq n 23 n isegʷusa yiɛrameɣ di tudart-inu!
Deg wakuḍ-nni, cerheɣ lebḥar, d marra mayen ɣar-s itteqqnen.
Yiḍfar-iten-dd ijj n umeddukel-nsen, ittlaɣa s qaɛ tifeqqaɛ i das-iziyyren x yidmaren:
– Ayyuuuub… Ayyuuuub… (Isem n uma!)
Walu! War xafes-d-itterri ḥedd!
Yuyur cwayt deg waman, isiɣi yitraɣa, ar mani iweḍḍer ura d netta!
Amenni qqiment rxezrat-inu yidrin s tefrat n imeṭṭawen, areccgent di lebḥar.
Tussa‑yi‑dd tɣufit di lwesṭ n waḍu… tettmeẓiy tudert qibal‑inu, tettmeẓiy; ar ami war tet‑twiliɣ… ar ami dewleɣ xezzreɣ mɣar 4 nni n yiḥramen dewlen‑dd ɣa razaɣ; ffɣen‑dd zeg waman ttudumen!
Awaren i yict n tudert tettec
Tura‑t: ℳarieme
