Yura-tt: Ɛebdelɛaziz ḤANNUN
G yijj n zzman yeεdu. Ijj n tnayn n imuccwen ttuɣa munen i tudert, ussan-nsen εeddun qeε d tcuni d taẓyuḍi. Ijj n uzir, ufin ijj n uleqqim n weɣrum deg webrid, negzen xef-s, ksin-t mtawan ḥuma a t-bḍan deg wezgen.. ijj n umucc iεjeb-as lḥal, ibbihra umi ɣa bḍan aleqqim-nni jer-asen. Maca umi dd-usin ad bḍan mɣananen xef wen ɣa ibḍan zeg-sen. Nihnin ttemcubbucen xef wi ɣa yebḍan, d yijj n ubaɣus a dd-yeεdu zzat-nsen. Seεdan-a ula d netta ttuɣa yirar deg-s laẓ, umi yeẓṛa imuccwen-nni wer msefhimen, yenna-asen: A hya ! Aqqa-ayi da, a kenniw-εawneɣ, aqqa yeqseḥ ad tebḍan aleqqim-nni…
Yebḍa-asen aleqqim-nni xef tnayn n izegnat, maca ijjen yegga-t d ameqqran xef wenniḍen s neεmada. Wer dd-usin a das-inin ca, d netta a dd-yessiwel, yenna-asen: Rajam, rajam ad ggeɣ ijj n uremmiz zeg wa ameqqran maḥend ad mquddan.
Wcin tansa, xezzaren, ttrajan ad yeεdel beṭṭu. Netta yegga ijj n uzeεεif yemɣar. Uca yerra azgen-nni d amezzyan xef wenniḍen. Yenna-asen: Haa lexxu wa yedwel d ameqqran xef wa … Ɛaynem a ten-ssemquddiɣ s yijj n uremmiz nniḍen.
Amenni i yeqqim yessemqudda deg-sen, nitni sekʷḍen deg-s, al umi isala yecca qeε izegnat-nni s tnayn. Ɛad i dd-rrin taynit imuccwen nnan : Ih! neccin d awmaten !! Mli ttuɣa nemsefham ili nebḍa nnit, necca neccin aleqqim-nni, iwa umi nettmenɣa yus-dd ubaɣus yirar xef-neɣ ibḍa-t nnit, yecca-t nnit.
