Ḥajitkum, yekker di min yeɛdun, ttuɣa din ij n wergaz ɣer-s ij n temɣart teccur s tɣennant. Walli wi tt-ɣa yerren x webrid, waxxa i tt-ɣa tenɣed.
Ij n wass, ttuɣa tenya akid-s x userdun. Netta ɣer zzat, nettat awern-as. Kkin x yij n yeyyar yallah mamek yemjer. Yenna-s: Xzar a tamɣart i icewwalen-a i ymejren imendi-ya cḥal ssnen ad mejren. iɣell-a yus-dd yuyyda, ca wer yujer ca.
Tenḍeq-dd nettat, tenna-s: « iyyar-a urid s imeyran i t-mejren, s tmecraḍ. »
Yenna-s: « Tebbet a tamɣart, ma jjin teẓrid ca n ucewwal imejjer s tmecraḍ ».
Tenna-s nettat: « Ali niɣ hwa, aqa nniɣ-ac imendi-ya kksen-t s tmecraḍ, uca aqa s tmecraḍ! ».
Amenni i ruḥen, netta yeqqar-as s imeyran, nettat teqqar-as s tmecraḍ. Alami iwḍen ɣer yeɣzar. Icuq zeg-sen userdun deg yeɣzar ḥuma ad ẓwan, amen llan di lwesṭ n waman, teqqar-as: « s tmecraḍ ».
Yenna-s wergaz-nnes: « ma a xaf-i tseqred niɣ ad acmeɣ aserdun a cem yeɣḍel ».
Walu tugi ad tesqer. Amenni i tsiɣi teqqar-as: « s tmecraḍ ».
Tessekɛa-t, uca yucem aserdun-nni i xef ttuɣa nyin. Yeẓẓeɛweḍ, tsur deg waman, uca indeh-itt yeɣzar.
Amen ttuɣa tɣeṭṭes deg waman, tessalay tnayen n iḍewḍan deg ujenna, waxxa wer tzemmer ad tini timecraḍ s uqemmum, teqqar-as-tt s iḍewḍan.
Umi i yeffeɣ ɣer tma n yeɣẓar, yuli d tsawent. Yelqa ca n yewdan, iseqsa-ten: « Wer teẓrim ij n temɣart yiwy-itt-dd yeɣzar? »
Ttbehḍen deg useqsi-nnes, nnan-as: « maca aqa iɣzar ittawi di teysart maci di tsawent ».
Yenna-sen: « necc tamɣart-inu deg-s taɣennant, ittawy-itt di tsawent! »
Ɛebdelwaḥed ḤENNU
Iɛawed-ayi-tt baba (ilul asegg°as n 1936)
