Iturjem-itt-dd zi teglanzit: Ɛebdelɛaziz ḤANNUN
Ijj n uyerẓiẓ yedder ittemhafa zi ssa ɣer da. Ijj n wass, yufa tamellalt temɣer d taqerqact, anct n čamma. teqseḥ, wer yelli wen tt-ɣa yerẓen.
Ayerẓiẓ yettebhet, wer yufi min ɣa yegg. Ilaɣa-dd i umeddukel-nnes iɛizzen ikfer, isseqsa-t: “Ta ma d tamellalt n tɣilast” ?
Yerra-dd xef-s yekfer: “ lla ! Tamellalt n tɣilast wer telli d tameqqrant”.
Iberreḥ-dd uyerziz i umeddukel-nnes abaɣus, yesseqsa-t : Ta ma d tamellalt n welɣem ?
Yerra xef-s “ Lla ! Wer telli ca n welɣem. Tamellalt n welɣem wer telli d taqerqact”.
Iweḍḍer uyerẓiẓ, wer yufi mani ɣa yeqqen tamellalt-a. Ixarres a dd-ilaɣa i yijj n umeddukel-nnes nniḍen, d abellirj. Yenna-as : Ta ma d tamellalt n Yilef ? Yessers-dd ubellirj tamellalt-nni zzat-s, ineqb-itt, tedduqqez-dd s nnefs, tegga Fssssssss! Yeffeɣ-dd zeg-s rriḥ. Yenna-as ubellirj: Haaaa! ta d tamellalt n uṣemmiḍ. Wah n uṣemmiḍ, minzi teccur s rriḥ…
Ayerẓiẓ d yekfer d ubaɣus umnen, ksin s tḍeḥḥakt neggzen s lefraḥt.
