Ijjen wass, ttuɣa yeggur Jeḥḥa d mmi-s, ttgewwaden aɣyul-nsen. Kkin x ca n tarbiɛt n yewdan, Slan-asen qqaren: « I ddegg n yewdan! Jjin aɣyul yeggur weḥd-s, nitni gguren x iḍaren! ».
Yenna-s Jeḥḥa i mmi-s: « Ni-dd akid-i ». Nyin s tnayen idsen, uca siɣin gguren.
Iwḍen ɣer ca n yewdan nniḍen, slan-asen qqaren: « Tnayen idsen x yijjen weɣyul! wer ttḥinnin x lmal agnaw! »
Yessḍar Jeḥḥa mmi-s, yeqqim netta yenya. Ɛdun ɛawed x ca n tarbiɛt n yewdan nniḍen, tteslan-asen qqaren: « Ya yilef uḥeggar, yejja mmi-s d ameẓẓyan yeggur, yenya netta: ».
Yeḍra Jeḥḥa x weɣyul, yenna-s i mmi-s: « Ni cekk a mmi! ». Yenya mmi-s n Jeḥḥa x weɣyul. Kkin x ca n yewdan nniḍen, tteslan-asen ɛawed qqaren: « Iḥenjiren n yiḍa wer deg-sen bu leḥya, netta yenya, yejja baba-s d ameqqran yeggur x iḍaren! ».
Yuza lḥal ɣer Jeḥḥa, Iderreɛ i weɣyul-nni, uca yeksi-t x ijiman, yebda yeggur zeg-s. Kkin x ca n yewdan ɛawed, uca ksin s tḍeḥḥakt, tteslan-asen qqaren: « Iwdan-a d ibuhaliyen, aɣyul ikessi iwdan, nitni d nitni i ikessin aɣyul! »
Lexdenni, yenneqleb Jeḥḥa ɣer mmi-s, yenna-s: « Teslid a mmi min dac-ɣa iniɣ; aqa min ma teggid wer tezmired ad teṭṭfed lxaḍer i yewdan! Uca ttegg min tettwalid cekk d wenni d netta! ».
Ɣer ɛawed: Aɣyul n jeḥḥa
