5 décembre , 2021

Jeḥḥa d ɛecra n yeɣyal

Di min yeɛdun, ttuɣa ttmunen jjmaɛet n yijj n ddcar, sqadan ijjen zi tarwa n ddcar ad iraḥ a dd-yeḥri imendi deg yijjen tsirt tigg°ej.

Tiweḍ-dd nnubet n Jeḥḥa. Syedden-as-dd tixuncay n imendi x ɛecra n yeɣyal. Yus-dd ɣer-s wemɣar n ddcar, yenna-s: Err taynit i yeɣyal a Jeḥḥa, aqa ɣer-k da ɛecra. Ɣer-k a dak iweḍḍer ca n yijj!.

Yenna-s Jeḥḥa i wemɣar: Ili-c tehnid!

Yenya x yijjen weɣyul, igewwed iɣyal nniḍen. Yiweḍ ɣer lwesṭ n webrid, uca yeḍra-dd ɣer-s ad yeḥseb iɣyal-nnes. Umi i ten-yeḥseb, yufa dinni tesɛa waha! yettebheḍ Jeḥḥa. Yudef-it unexliɛ. Yenna aked yexf-nnes: Safi iweḍḍer-ayi weɣyul! Qeḍweɣ-tt-dd aked jjmaɛet n ddcar.

Yeḍra x weɣyul, iɛawed leḥsab zi jjdid, maca twalat-a yufa ɛecra. Tedwel-dd deg-s tfawt. Yenna aked yexf-nnes: Ttuɣa buqareɣ di leḥsab waha.

Yenya ɛawed x weɣyul, isiɣi yeggur. Yeḍra-dd ɣer-s ad yeḥseb zi jjdid. Yufa tesɛa waha, ixess-it yijjen! Umi i yeḍra x weɣyul, iɛawed leḥsab, yufa dinni ɛecra.

Yekɛa, ittɣil-as ca n weɣyul ittnuffur-as. Yeqqim adu yijjen tsejjart ixezzar min yeɛna weɣyul zeg yeɣyal i das-ittnuffaran. Yeɛdu-dd x-as ijjen uwessar, yufa-t yecḍen. Yenna-s: Min cekk yuɣin tesbedded iɣyal-a amen x-asen ddqel? Min c-iceḍnen?

Yenna-s Jeḥḥa: Aqqa-c ca n weɣyul zeg yeɣyal-a ittnuffar-ayi. Ijj umur ad ḥesbeɣ ad afeɣ ɛecra, ijj umur ad afeɣ tesɛa.

Iɛawed uwessar leḥsab, yenna-s i Jeḥḥa: Ruḥ ɣer ccɣel-nnec, kkes x-ak ttnawi. aqa ɣer-k da ɛecra n yeɣyal.

Yenya Jeḥḥa x weɣyul. Yugur uwessar. Ɛad wer yigg°ij, uca ittesla i Jeḥḥa yesɣuyyu. Yeɛqeb ɣer-s, yenna-s: Min din ɛawed.

Yenna-s Jeḥḥa: Amcum-a n weɣyul ittirar akid-i, aqqa-c ɛawed yennuffar-ayi.

Yenna-s uwessar: Ha ḥseb!

Ikumasa Jeḥḥa iḥesseb: Ijjen, tnayen, tlata… tesɛa! Aqqa-c da tesɛa waha i da, ijjen wer ssineɣ manis yekka!

Yeksi uwessar s tḍeḥḥakt, yenna-s i Jeḥḥa: I weɣyul-nni i xef tenyid? aqa tettud-t wer t-teḥsibed!

Lexdenni, yeksi Jeḥḥa ula d netta s tḍeḥḥakt, yewta di tenyart… Uca yessen illa ttuɣa iḥesseb iɣyal nneɣnit, ittettu wenni xef yenya.

Ɣer ɛawed: Aɣyul n jeḥḥa

Ɛebdelwaḥed Ḥennuhttps://lerifain.fr/
S tira.. iles yeccat iẓewran...

Amaynu

Yeqqen ɣer-s