Ijj ittaley ijj ihekk°a, tḥajit n yensi d wuccen.

Ijj n wass zeg wussan i yeɛdun, insi, tiwey-it-idd deg yij n lexla, yurf s fad. Iban-as-dd yij n wanu, iruḥ ɣer-s, yufa-t yulleɣ, yexs ad yeswiẓẓeḍ ɣer ubuqal, ḥuma ad t-idd yejbed, wer ittiweḍ. Ixarres aked yexf-nnes, yenna-s ad negzeɣ, uca ad t-idd-ṭṭfeɣ.

Amenni nnit, yengez, maca wer tt-yenwi ila ad yehwa ar tisi, abuqal nniḍen i yellan di tisi n wanu a dd-yaley. Yeswa yensi, yerra fad, maca wi t idd ɣa yessilyen zi tisi n wanu ?

Ijj n cwayt, yij n wuccen a dd-ssenni yeɛdu, yessijj deg wanu, ittwala din insi. Yenna-s :

– Mamec teggid tehwid din ? Yerra-dd x-as yensi :

– Yehwen rray, aqqa-c cebber deg ubuqal-nni din sennej, uca a dd-tehwid ar da.

Uccen, bla ma ad yessexdem leɛqel, yenḍu x ubuqal-nni i yellan di ḍḍhar, lexdenni, icebber-dd yensi deg ubuqal i yellan di tisi. Uccen yeqqim ihekk°a, insi ittgeɛɛad, alami msagaren di lwesṭ n wanu. Yenna-s wuccen i yensi : maɣar mani tettraḥed ? Yerra x-as yensi, yenna-s : « d ta d dduneyt, ijjen ittaley, ijjen ihekk°a ».

Yesmun-itt-dd : Ɛebdelwaḥed ḤENNU

Amaynu

Yeqqen ɣer-s