Tanfust n Gianni Rodari.
Tasuɣelt n: Asmaa Aouattah
Sin (2) n iḥenjirn tteɛyarn gi zzenqet, ssufɣen-dd awal (tutlayt) d amaynu (d jjdid) sawaln zeg-s.
Inna-s ijjen:
– Brif, braf.
Irra-dd x-as wenneɣni
– Braf, bruf
Uka ksin gi tḍḥḥakt
G ijj n ubalkun, iqqim ijj n uwessar iqqar, arendad-ines ict n twessart teqqim ula d nettat gi balkun-ines.
– Mana ibuhaliyyen-in n iḥermucn- tenna-s twessart i uwessar-nni
Awessar-nni imxaṭa akis g uxezzar:
– Nec ufiɣ-ten ssawalen nican.
– Yak ma zeɛma tfehmed-asen?
– Yyih, kulci.
– Tuka zid min nnan!
– Amzgaru inna-s “ass a d asebḥan”, wenneɣnni irra-dd x-s “tiwecca ɛad ḥsen”.
Traḥ a das-tini ci, tettsla i iḥenjiren-nni bdan ssawalen ɛawed:
– Maraki, barabaski, bibbirimuski- inṭeq-dd umezgaru
– Bruf irra-dd x-s wnneɣni
Uka ḍeḥken ɛawed
– Raḥ uka ini-ay qa tfehmed-asen xlli d lux- tenna twessart-nni.
– I ma lla, inna-s umezgaru “ɣer-neɣ sswirti nedder”, inna-s wenneɣni “tudert d tasebḥant”.
Texzer g-s twessart-nni, tenna-s:
– Iwa zeɛma d tidet tudert d tasebḥant?
Irra-dd x-s uwssar-nni:
– Brif, braf, bruf
