Zi tsekla tamaḍlant n imeẓẓyanen
Yesmezɣ-itt: Ɛebdelwaḥed ḤENNU
Audio
Ḥajit majit, seksu d tyaẓiḍt, mala tweḍḍer a tt-naf.
Yekker di min yeɛdun, ttuɣa dinni ijjen uɣerḍa ittɛic deg yijjen tagant. Uca ttuɣa tneqq-it tigg°di. ttuɣa ittegg°ed ula zi tili-nnes. ad yili ibedd, mala yesla ɣir i tefray n tseklut ttweṭṭant-idd, ad yeksi s tarewla, ad yadef deg wexbuc-nnes.
Cḥal n twalatin, ttuɣa ttraḥen ɣer-s imudaren nniḍen ɣer wexbuc, ttgarenzen x-as, qqaren-as: Min cekk yuɣin tetterjijid ula zi tefray n tseklutin mala wḍant ɣer tmurt? Egg ul deg yexf-nnek, nḍer x-ak tigg°di-nni i deg-k!
Ijjen wass, aɣerḍa yuza ɣer-s lḥal, uca iruḥ ɣer yefri n wayrad. Yufa zzat-s ixsan, yallah ɛad mamek yecca. Yufa-t yemḥeḍ ixf-nnes, yerra cwayt azellif-nnes.
Yegga uɣerḍa ul deg yexf-nnes, uca yeḥbec aked unewwar n ujellid n imudaren, ikumasa ittirar-as x weɛrur.
Yuka wayrad aked tḍarin n uɣerḍa zrudduḥent-as x weɛrur, uca yekker ibedd. Yezzels ixf-nnes, isur uɣerḍa yehrubbez-dd ṭṭerf-nnes.
Yekɛa wayrad, yekref tanyart, yesberquqqi tiṭṭawin, yeccuɛri, yessufeɣ-dd uyran, uca yesɣuyy s min yeɛlam di jjehd! Lexdenni, imudaren n tagant merra nxelɛen, kulha manis i dd-yessajja, ttrajan mɣar ayrad melmi ɣa yebbar aɣerḍa deg uqemmum.
Yegg°ed uɣerḍa ayellin, min deg-s itteqdiddis, ttehnuccaran-dd akid-s imeṭṭawen d iɣezran.
Yenna-s wayrad: « Min cekk-dd-yiwyen ɣer-i da ay aɣerḍa, tettirared-ayi x weɛrur? Wer tessined ila necc d ajellid?«
Yerra x-as uɣerḍa s unixses: « Wadem-ayi a sidi ajellid, ɛemmers ad ɛawdeɣ. aqqa-c necc ttuɣa tneqq-ayi tigg°di, tterjijiɣ ula zi tili-inu. Ttuɣa ḍeḥḥken xaf-i imudaren nniḍen. xenni xseɣ ad neḍreɣ tigg°di, ad ggeɣ cwayt n lkuraj, uca usiɣ-dd ɣer-k.«
Yeksi wayrad s tḍeḥḥakt, uca yenna-s: « Sqenɛ-ayi s ca n wawal, uca wer cekk-ttetteɣ ca« .
Yenna-s uɣerḍa: « Mala wer dayi-teccid, a dd-yas ca n wass a xaf-i tbedded, uca a dayi-tafed zzat-k« .
Yeksi wayrad s tḍeḥḥakt ɛawed min yeɛlam di jjehd, yexzer ɣer uɣerḍa, yufa-t merra ittqefqif, yenna-s: « ɣer-k ccwerti tufid-ayi jjiwneɣ, yallah xzer manis ɣa tekked, wer ttɛawad amur nniḍen« .
Ruḥen wussan usin-dd, alami d ijjen twalat, yelluẓ wayrad, uca yeffeɣ ad yegmer. Yekka adu yijjen tseklut, wer yuɣir ca i yijjen tracca ttuɣa nedyen-as-tt dinni ca n inegmaren, uca yemxumbel deg-s.
Yeqqim yesɣuyyu min yeɛlam di jjehd. Munen-dd yimudaren n tagant, maca wi ɣa iqerrben ɣer wayrad? alami i dd-yusa uɣerḍa, yebḍa itteɣẓaẓ timurar i zi texdem tracca-nni.
Itteɣẓaẓ, itteɣẓaẓ… Ayerẓiẓ ittnakad-it-idd, yeqqar-as-dd: « Ahnaci ay amcum, aqa ɛlayen xeccen-dd x-ak inegmaren!«
Aɣerḍa ayenni ma yiwiḍ ittɣẓaẓ di tracca, alam i dd-ifekk ayrad!
Yuder ɣer-s, yenna-s: « Ni-dd x weɛrur-inu. »
Yenḍu uɣerḍa x weɛrur n wayrad, uca yeksi zeg-s s tazzla alami yiweḍ ɣer yefri-nnes. Yuder ɛawed, yenna-s: « Hwa-dd ay aɣerḍa! ».
Yehwa-dd uɣerḍa. Isellem x-as wayrad, yenna-s: « Ass-nni umi i dayi-tennid ca n wass a xafi-tbedded a dayi-tafed, ḍeḥkeɣ x-ak. Wer c-umineɣ. Nniɣ aked yexf-inu aqa cekk d ijjen uɣerḍa waha, wer yelli minumi ɣa tnefɛed. Maca ass-a, d tidet tsellked-ayi zi tmettant, tfekked-ayi zi tracca n inegmaren. Zi ssa d usawen, Necc waxxa d ajellid, maca cekk ad tilid d ameddukkel-inu. Wer ɣer-k minzi ɣa tegg°ded.«
Imudaren i ttuɣa yesḥessan i wemsawal i yemsaren jer ujellid n imudaren d uɣerḍa, ffɣen-dd, uca ggin merra camxir, wtin deg wuru i uɣerḍa d taryazt i deg-s.
Iɛejb-as lḥal i uɣerḍa, ha yenḍer tigg°di, ha yedwel d ameddukkel n wayrad.
Amawal:
Tagant: Lɣabet
Imudaren: Lḥayawanat
Taseklut: Tasejjart
Ɣer ɛawed: Uccen d tlata n ixennusen
