Aṭṭaṣ iy ibeddlen! mli d ict, ili nesseɣli-tt.
Aqbuc umi ttuɣa ttleḥḥafen ixerṭiṭen, wer ssineɣ cḥal wer dd zzag-s nuri aman i tsessi!
Aɣarraf-nni n tlaxt i ttuɣa yettemrusan di tburjet, izzuɣmet tamkant-nnes i yerrin tili.
Tanewwact-nni ttuɣa ittḥeyyar leεwin x tnebdat n webrid, ḥa mli tisslaw waha, ad deg-s nettekkes fad-nneɣ s lxezrat, war din teqqim qaε limart-nnes, am xmi εemmars ma ttuɣa din tamcant-nnes. ma d ict i ibeddlen? aṭṭas i ibeddlen!
I wurar-nni ttuɣa ilellcen s yimedyazen di lemṛaḥ, mani yella? i yimenɣan-nni i ttuɣa ittemsaran di mkul urar, maɣar wer qqimen?
Ttuɣa urar mala wer dag-s yemsir umenɣi, war illi d urar, ittemsara umenɣi, awarn-as ittas-dd lehna, tudert tekmel, lexxu walu amenɣi deg wurar, maca awarn-as, wer dinni lehna ula d tudert. Ula d tamarraqt, lḥimeẓ, wer qqimen ttmeccan deg wuraren.
Arjuj εad isɣuyyu, maca wer iqqim ca isnanna tazart am cḥal uya, d lxurafat waha.
Atmun yenqes wesbeddi-nnes, ruḥ ruḥ mani ɣa-tettwalid ca ibedd, hi wesmuni n ledcur ttuɣa dd- ittegg yeqqim? war yeqqim ismuna ula d ayet bab n ddcar, ḥayed εad ledcur!
Ḥ. LMADANI
10 – Yulyuz – 2022
