Yesmun-itt-idd: Ɛebdelwaḥed ḤENNU
Ḥajit majit, seksu d tyaẓiḍt, Yekker yij ufellaḥ, ttuɣa kul tuffut, ad iberdeɛ i weɣyul-nnes, a x-as ini, tnayen n ifunasen ittgewwed-iten. al ɣa yaweḍ ɣer yeyyar, uca ad iḍewwel aɣyul, ad icedd ifunasen d tyuya ɣer wesɣar, ḥuma ad kerzen! ifunasen, nnhar yekmel nitni ad jebbden asɣar, aɣyul iḍewwel, ihedda. Al ɣa teɣli tfukt, uca a dd-iberdeɛ ɛawed ufellaḥ i weɣyul-nni, a dd-igewwed ifunasen, a dd-yas ad irewweḥ!
Ij n wass, iruḥ weɣyul ɣer ufunas, yenna-s: « min x-ak icedden aḍuqqeẓ-a qeɛ? aqa d aṭṭas x-ak! »yexzer deg-s ufunas s wesḥissef, uca yerra x-as: « iwa min ɣa-ggeɣ ay aɣyul? ḍebber xaf-i! »
Yenna-s weɣyul: « egg ixf-nnec thelked, a dak-dd-yessers macca wer tt-ttḥada, uca cekk tehnid! »
Amenni i das-yegga ufunas-nni! yessers-as-dd ufellaḥ leɛlef, umi dd-yekker ɣer ssbeḥ, yufa wer t-yeqqis! Lexdenni, iberdeɛ ufellaḥ i weɣyul, igewwed ijj ufunas, uca iruḥ ad yekrez. umi ɣa yaweḍ, aɣyul ittraja a t-yeqqen bac ad iḍewwel, ad yehda! maca netta yeqqen-it ɣer wesɣar aked ufunas nneɣni!
Yeqqim ufellaḥ-nni ikerrez s weɣyul d ufunas! Irewweḥ-dd ihellek! yewtta! uca iseqsa-t ufunas-nni i yeqqimen di taddart: « iwa mamek tufid ay aɣyul? »
Yexzer deg-s weɣyul s uɛesseb, yenna-s: « cuf, aqa ttesliɣ-as yeqqar belli afunas-nni yehlek, yexs a dak-iɣers! tiwecca bedd x iḍaren-nnec, kker ssenni, ecc leɛlef-nnec, malla texsed wer dak-yessekki taxedmit! »
Yexzer deg-s, ufunas, yenna-s: « i tennid? »
Yerra x-as weɣyul, yenna-s: « wah! ɛawed zi ssa d tsawent, kul ijjen a tt-yawi deg yexf-nnes, ad yexdem ccɣel-nnes! »
Ɣer ɛawed: Jeḥḥa d ɛecra n yeɣyal
