8 décembre , 2021

Ṭuca d Buyilem (Tanfust)

Yura-tt: Ɛebdelwaḥed ḤENNU

Lexdenni… umi tessijjed zi tewwurt ḥuma ad texzared wi din di berra, awarn i umi dd-trewled zeg wexfif ɣer wexxam-a. Tεeqled x-as? Axxam-a i yellan mɣar weḥḥd-s di lwesṭ n lexla-wmaxla! Trewled-dd! Mɣar ṭṭumubinat, ca yenneqleb, ca yeppincar, ca yekmeḍ… Ususent deg webrid i ɣer-s dd-ittawyen… Tufid tawwurt terẓem, tudfed-dd mɣar s cwaycway…

Γer berra, ittban d ij n wexxam yessagg°ad. Maca ɣer daxxel, deg-s mɣar leḥwayej isekk°an. Ha tiseεεet n nnuqert, εad txeddem waxxa yuli x-as wexmar n qunedɛa, tetteslid ula i utektek-nnes! Ha lekrasa d ṭṭwabel xedmen-ten s ukeccuḍ azegg°aɣ… Leḥwayej i da merra n nnuqert, maca kulci tuli x-as tεejjajt. Teqqimed txezzared di txuzan i da yellan, lqant-cek-dd tzeyyatin n binu azegg°aɣ d aqdim. Teksid-dd ij n tzeyyat, tessuḍed x-as taεejjajt ḥuma ad teɣred ism-nnes; «Ṭuca». D wa d isem n binu-nni. Treẓmed tazeyyat, tkebbed lkas amezwaru, d wiss tnayen, awarn-as tdadared-tt tekmel bla lkas. Lexdenni i ɣer-k dd-yeḍra belli taḥenjirt-nni i ttuɣa kid-k umi tenqelbem s ṭṭumubin qqaren-as «Ṭuca»!.

Tennid aked yexf-nnec; « mayemmi i deg-s ɣa-semḥeɣ? Ili qqimeɣ akid-s dinni… ». Maca min yemsaren yemsar, wer ɣer-k min ɣa-tegged. Yedwel uxarrres-nnec yennuɣ jer Ṭuca i tsessed, d Ṭuca i yennuɣen di ṭṭumubin i yenqelben, tejjid-tt tettuzzur s idammen, tettneẓbar… trewled-dd d tarewla. Ma amenni niɣ urid amenni?..

Zi ssenni, teqqimed tsessed, tsessed, tsessed… Alami i deg-k yugur binu mliḥ, tekkred texsed ad tenhezzed, uca yiwey-ic wannay. Lexdenni tekεid. Tekkred, teqqimed tettreẓẓid merra min da deg wexxam-a! Cwayt, uca a zeg-k traḥ tisi n wexxam, tsured deg yefri adu tmurt anict n min t-iqedden. Teggured deg-s, teggured … alami tiwḍed ɣer yexf. testeftufed ḥadar ad tafed manis ɣa-teεdud, uca a x-ak dd-tewḍa rrimet n yij n temɣart tettwaneɣ! kksen-as tiṭṭawin d yiles, uran-as deg yedmaren: «Ṭuca»! Tesɣuyyed.. trud.. teksid s wesḥissef.. maca wer ɣer-k min ɣa-tegged…

D manaya i yemsaren, maca alik-ac tidet i yellan lexxu, wer yelli wi tt-ɣa-yekksen: Cekk lexxu d aqettal. aqqa-c Ṭuca i kid-k yenqelben di ṭṭumubin, ẓduxxneɣ-tt s tezwict. Maca tessned wi tt-yenɣin? D cekk! Cekk d aqettal. Awarn-as, tusid-dd da ɣer wexxam-a, teswid binu qqaren-as Ṭuca. tiḍewḍin-nnec εad aqqa-tent recment di tzeyyatin d lkas i zi teswid. Ternid-dd tamɣart nniḍen, tenɣid-tt, tekksed-as tiṭṭawin d yiles, turid-as «Ṭuca» deg yedmaren. Manaya merra wer yelli d cekk i t-yeggin, maca wer ɣer-k minzi ɣa tessekned illa urid d cekk. Tsured!.

Yeqqim Mimun x lkursi, ifassen d iḍaren kerfen. Aqemmum yeccur s ikettanen, ibelleε s skuč… Meεlik mɣar yezmer ad yessiwel ḥuma ad izaweg, ad iḥeccem, ad yini min ɣer-s… Walu. ittɣufa. Yallah yeqqar: « mmmmm… mmmmm… » Wenni i kid-s yessawalen yexreg ij n yilem i uzellif-nnes, udem-nnes wer ittbin. Ɣer-s ij n uxedmi anict n min t-iqedden. Kul ma iqerreb cwayt ɣer Mimun, ad yenneẓweḍ, ad yerni deg uweεεeḍ yemmureḍsen; « Mmmmm… Mmmm… »

Yekkes-as skuč x uqemmum, Yessufeɣ-as-dd ikettanen i ttuɣa das din yebbeẓ, uca akid-sen dd-imun usiḥart s merra min deg-s yeεbubbzen n iḍuqqaẓ. Yebda yessazzal-dd lεunser n uḥeccem i ttuɣa yenqebsen jer tmijja d skuč: « Ɛafa-k, ejj-ayi ad rzuɣ manis ɣa-kkeɣ.. Min dac-ggiɣ?… »

Buyilem, yeqqim qibal-nnes x yij n lkursi, ittirar deg uxedmi-nnes, axmi wer dd-yerri lexber i uzaweg n Mimun. Yejja-t yestextux weḥd-s weḥd-s, alami isala, uca yeksi s tḍeḥḥakt min yeεlam di jjehd… Ibedd-as imetmi i Mimun, yettebheḍ, yeqqim ixezzar waha. Yexs ad yenneẓweḍ maca wer ɣer-s mani ɣa yenneẓweḍ, yegga-s akraf maca aqa d akraf!

Yennexḍef-dd Buyilem x lkursi, yunneḍ-as-dd i Mimun amen deg-s ixezzar. Ittḥada-t s uxedmi deg uzellif d uɣembub d yiri… Mimun ittneqfaz, ittnixsis…

Yenna-as: « Sel ɣer-i a dac-iniɣ; cekk d aqettal ! isem n «Ṭuca» yeched x merra ɣezzu i teggid. Mala texsed ad tnejmed zi lḥebs, min ac-ɣa iniɣ egg-it, mala wer texsed, aqa tessned nnit min c-ittrajan. »

Yekεa Mimun, yeksi s tɣuyyit: « Necc wer lliɣ bu d aqettal, d cekk i yeggin kulci… Ḍelq-ayi ssa a mmi-s n … »

Yus-dd Buyilem qibal-nnes, yenna-s mɣar s cwaycway: « Ccccct… wer ttεesseb bu yexf-nnec. Safi mala wer texsed ca, xzar cwayt mliḥ min dac-ɣa ssekneɣ. »

Yekkes ij ukettan x utilibizyun, yesserɣ-it, ittban-as-dd yijjen yekref deg wemkan-nni mani i yekref netta, yesɣuyyu yeqqar: « Egg min texsed, necc ssneɣ ixf-inu… Wer dac-tteggeɣ bu rray… »

Iεawed iεebbeẓ x yij ubuṭun, ittban-as-dd lexber yeqqar belli Lmeḥkama n Nnaḍur teḥkem x Masin Γurḍu s leḥbes min ɣa yekk yedder. Masin Γurḍu, d wenni abeεda i yeẓra ttuɣa yeqqim x lkursi-nni mani i yeqqim netta.

Yenna-s: « Lexxu ixḍar a Mimun, ma ad tḍefred min dac-ɣa iniɣ, ma ad tkemmled min ac-yeqqimen di lḥebs? Aqa am cekk am Masin Γurḍu… »

Cwayt, uca ad slen i later n tecli sennej. D ca n ḥedd i dd-yudfen ɣer wexxam. Slan ula i lherd. Amur-a wer yelli d ijjen i dd-yusin. Iruḥ Mimun ad yessiwel, maca deɣya yeqma-s-tt Buyilem. yebbeẓ-as εawed ikettanen deg uqemmum, yessunneḍ-as skuč, iεan-it deg yij n texzant.

Yenneqḍeε lḥess n Buyilem, Mimun ula d netta ibedd zeg uneḥmez, yeqqim yesḥessa min ɣa yemsaren waha. Yesla i wawal n temɣart, tessawal aked wenni i kid-s, teqqar-as: « Mḥemmed, a Mḥemmed, araḥ-dd ad texzared min da! »

Yessen Mimun illa dinni ca n yijjen qqaren-as Mḥemmed, aked tenni i yessawalen. Ittban illa tnayen idsen i dd-yudfen. Maca Buyilem laḥess-nnes! aqqa-t yennuffer.

Yus-dd Mḥemmed, qqimen xezzren s tnayen idsen deg yefri… Wer ttwilin walu. tenna-s: « Yallah a ssa neffeɣ!.. »

Amen wer deg-s yexzir, yenna-s: « Raja ad hwiɣ ad xezreɣ min da deg yefri-ya!.. » tenna-s: « A kid-k hwiɣ! », maca yesqenε-itt bac ad teqqim sennej ar mala ilaɣa-dd x-as.

Teqqim txezzer zi sennej, netta ittemcumbuḍ ḥuma ad yehwa ɣer swadday.. Yemneε deg yij uqaču n lḥiḍ yerca, uca a zeg-s iraḥ. Yehwa ar tisi.. Teqqim tettlaɣa-t zi sennej : « Mḥemmed, Mḥemmed… aqqa-cekk mliḥ? Mḥemmed, err-dd xaf-i.. »

Yessiwel-dd amen dd-ijemmeε ixf-nnes zi weṭṭu: « Wer ttegg°ed a Meɣniyya, aqqa-yi mliḥ, wer dayi-yexsir walu. »

Lexdenni, ibedd-dd qibal i lbabet-nni manis i dd-yehrubbez ḥuma ad ittwala Meɣniyya, maca yesla i utemtem n Mimun i yenqebsen di texzant… Mimun, wer yezmir ad yessiwel s ikettanen i das-yeccuren aqemmum, d skuč i x-as yunnḍen. ittegg illa : « Mmmm, Mmmm… »!

Tettwala-t Meɣniyya yerεeb, ixezzar jjihet n manis i dd-ittekk utemtem-nni. Tettebheḍ ula d nettat, wer tessin min ittwala, ula d minumi ittesla. Amen t-ttseqsa: « min din? ».. εad wer tkemmel awal-nnes, d tekti n tcaqurt tusa-s-dd i Mḥemmed di ddhar n uzellif, yewḍa din, wer yerri nnefs..

Teksi Meɣniyya s tɣuyyit, uca terwel ggur tettcuqa di leḥnuḍ, teffeɣ zeg wexxam-nni, tweḍḍer jer ṭṭumubinat i yenqelben deg yebriden, d yewdan i izellεen, meḥḍen di legεudi, mɣar izan ttzebziben x-asen…

Yessijj-dd Buyilem zi tburjet, ittwala-tt teɛlef s tazzla, tigg°ej x wexxam-nni. Yedwel ɣer mani i yebḍa azellif i Mḥemmed. Rrimet-nnes temḥeḍ di tmurt. Aneḍrar n idammen mbezzaɛen di tmurt. Jersen, dewlen am iceqḍiḍen n tsa. Yeẓẓuɣɣer-it zeg uḍar, yiwey-it ɣer yij n missa n wuzzal d tazegrart. Yeksi-t, uca imeḥḍ-it x-as sennej.

Yessajja-dd Mimun zi tferzizza n tewwurt n texzant, ittwala-t min ixeddem. Ittwala abrid n idammen yeḍfer rrimet n Mḥemmed umi i tt-yeẓẓuɣɣer. Ittbeɛɛer tiṭṭawin, itteqdiddis s tigg°di, ul-nnes itteffeɣ-dd zeg uqemmum-nnes!

Ittwala BuYilem iḥert-dd x yij n lmencar n kuryinti, yebda ittrankar-it. ɣer umezwar yugi a das-irankar, maca yewta ij n tnayen n twalatin, uca yesmuhart. Zzhir n lmencar yerni-as tigg°di i Mimun. Yeqqim wul-nnes ijebbed x rebɛin. Cwayt, ittwala-t yesnegz-as azellif i rrimet n Mḥemmed. Yewḍa di tmurt, yeksi-t-idd zeg ucewwaf, yessers-it sennej i rrimet. Lexdenni, Mimun wer izemmer ad yesber. Yugem-dd merra min ttuɣa ɣer-s deg wadan, yexs a dd-ibeɛbeɛ s uɛuqqi, maca wer ɣer-s manis i dd-ɣa yeffeɣ! aqemmum ibelleɛ.

Yesla-s Buyilem. Iruḥ yerẓem x-as tawwurt. Yekkes-as skuč, uca a dd-ffɣen iɛuqqan d qadus, smunen-dd akid-sen ula d ikettanen i ttuɣa ɣer-s deg uqemmum, ca isur x Buyilem, ca x tewwurt n texzant, ca iseyyel-as-dd aked uqemmum, yewḍa-yas x warruḍ! Yeẓẓuɣɣer-it Buyilem zeg uḍar, yebda yessexnunnus-it deg idammen i dd-yekkin zi rrimet n Mḥemmed. Yessufeɣ-it-idd, iḥaz-it ɣer yij n ṭṭerf, yenna-s amen yesskan s uḍaḍ ɣer uzellif i yemmersen sennej i rrimet : « Wi t-yenɣin? »

Yettebheḍ Mimun, wer yufi min ɣa yini!Yerni yenna-s Buyilem: Xseɣ ad sleɣ i twarrit x useqsi-inu, ad tili nican!… S uya, a dac-ɛawdeɣ i useqsi qbel ḥuma ad tessned mliḥ minzi xaf-i dd-ɣa terred : « Wi t-yenɣin ? »

Yessufeɣ-dd Mimun asiḥart yiẓeḍ s ikemsan n tigg°di. Yenna-s : « Wer dayi-neqq ca. Ɛafak ! wer dayi-neqq ca. Xseɣ ad ddreɣ. »

Yekkes-dd Buyilem taxedmit, yesqerreb-as-tt ɣer wancucen, amen das-yeqqar s tmijja d taḥercawt : « Wciɣ-ac-dd aseqsi. Ttrajiɣ a xaf-i dd-terred. Deɣya ! »

Yekɛa Mimun. Kkin-as-dd x tiṭṭawin. Yebda yesɣuyyu : «D cekk i t-yenɣin ! D cekk ay ilef n uqettal ! Fekkem-ayi ! fekkem-ayi !… »

Meɣniyya i ttuɣa ittrakk°alen, tiweḍ-as tɣuyyit n Mimun ar ameẓẓuɣ. Tbedd, texzer-dd awern-as. Ittban-as-dd wexxam ɣer lagg°aj anict n yizi. Tesber cwayt, uca tesla ɛawed i tɣuyyit tejhed. Tɣuyyit n ca n yijjen yettwagg deg-s ɣezzu!.

Ttuɣa-tt d tɣuyyit n Mimun. Yugi ad yegg rray i BuYilem. Yessekɛa-t, uca yeksi-dd lmencar n kuryinti, iqess-as tamceḍt n uḍar, mmenḍrent tfednin-nnes am diha. Qqimen mɣar idammen d tisebbalin. Wer din min yekka, uca tekka x-as lɣaceyyet.

Wer yexs ca a t-ineɣ. Buyilem yeḥdaj Mimun yedder. Meɛlik yexs a t-ineɣ ili yenɣa-t zi melmi. Yufa-t amenni yesxef, iruḥ yesseḥma-dd ij n tgersa alami tedwel d tazegg°aɣt. Yessers-as-tt x wemkan-nni manis i das-iqess aḍar. Ifaq-dd Mimun s leḥriq n wekmaḍ. Mɣar rriḥet n ccyaḍ tettali-dd zeg uyezzum-nni. Yesɣuyy zi jjdid. Maca twalat-a, tɣuyyit wer telli ca am tenni n umezwaru. Twalat-a, tɣuyyit n yijjen yettwerna. Tɣuyyit n yeɣzar xmi i zeg-s qeṭṭan waman zegga yeḥmel. Min x-as icedden aya ? Meɛlik yenna min yexs Buyilem a zeg-s t-isel, ili lexxu qeɛ wer ittwili azgen n temceḍt n uḍar-nnes temẓeryaḍ am diha s lmencar n kuryinti. Yexs ad yessili tmijja-nnes bac ad yini tidet. Maca min ɣa tessilyed di tmijja deg wudem n yijjen ikerf-ic, ɣer-s ɛlamkul lesnaḥ jer ifassen ?…

Iruḥ Buyilem ɣer yij n n nnibira ttuɣa-tt di teɣmart, qeɛ tuli x-as tɛejjajt, qeɛ deg-s ibeqqiḍen n idammen.. Iḍeffer-it Mimun s ifilan n lxezrat, ittxemma min ɣa yegg. Yekkes-dd ssenni ij uqedduḥ wer yeḍhir min deg-s. Yugem-dd zeg-s deg yij n tẓewḍa. Manayenni d aberkan, yerwi, am uberyuḍ. Yeksi-t ɣer Mimun, itticc-as s tɣenjayt. Yeqqar-as : « Ecc ! Ecc !.. »

Yessagg°aj Mimun aqemmum-nnes. Yugi ad yecc. Maca yeṭṭef-as-dd aɣembub di tummest, yebda ittebbar-as tiɣenjayin n macca-nni s uɣil deg uqemmum. Wer din min yekka, uca iɛuqq-dd manayaenni s kulci.

Yeksi-dd Buyilem taxedmit ɛawed. Yesqerreb-as-tt ɣer wancucen am umezwaru. Yenna-s : « Aqqa-yi ɛad ttrajiɣ-c. Wi yenɣin win ? » (yessken-as ɣer rrimet n Mḥemmed i imeḥḍen x missa.)

Twalat-a, wer ixarres qeɛ Mimun di min ɣa yini, wer t-yecqi min ɣa yini. Yerra x-as : « D necc i t-yenɣin ! Nɣiɣ-t.. wah nɣiɣ-t ! Qesseɣ i yemma-s iri… »

Yeksi Buyilem s tɣuyyit : « Tenɣid-t !… »

Itterra-dd x-as Mimun s tɣuyyit kter : « Nɣiɣ-t wah ! »

A das-yini ɛawed s tɣuyyit : « Tenɣid-t ! »

A x-as yerr ɛawed s min yeɛlam di jjehd : « Nɣiɣ yemma-s !… Kkseɣ-as iri… »

Qqimen amenni sɣuyyun, alami i telqef Mimun ij n thistirit, yumen ixf-nnes illa d netta i yenɣin Mḥemmed. Lexdenni, yeqqen-it Buyilem zeg yij n uḍar s tselselt n wuzzal. Yegga-s tbanta, waɛliha yewca-s lmencar n kuryinti, yenna-s : « Feṣṣel-it ! »

Yeqqim Mimun ittfessel di rrimet n Mḥemmed s yij n thistirit, wer ittici min ittegg. Iqess-it d ifetwisen. Buyilem ittsejjel-it s kamira.

Umi ikemmel, yexzar di lmencar-nni i yeṭṭef. Yezzaryeḍ-it am diha, yedwel ɣer deffar amen ixezzar deg ifassen-nnes. Wer yumin illa d netta i yeggin manayenni. Yeqqim ɣer tmurt. Yegga azellif-nnes jer ifadden-nnes, yebda yettru.

Iḥart Buyilem x lmencar-nnes. Yelḥem cwayt aɣirin, yeqqim ittzeyyaf-it. Yedwel-dd ɣer Mimun, yenna-s : « Nniɣ-ac cekk d aqettal. Mayemmi i das-teggid amenni ? Ya ul aqqa-t ɣer-k niɣ ! wer deg-k yelli waxxa d gram n leḥnuniyet !… »

Yekker-dd ɣer-s Mimun amen ittqeyḍar x uḍar-nnes iqessen. Maca teṭṭef-it tselselt i zi yeqqen. Yedwel ɣer deffar ɛawed. Yuka aked yexf-nnes yudef deg yij n tirart wer das-izemmar. Yuka aked yexf-nnes yewḍa deg yij n lebḥer yeccur s lehwayec, netta wer yessin ad iɛumm. Wer itteslik illa mala yedwel d lhaycet ula d netta.

Ilaɣa-t-idd Buyilem zi jjdid : « Ay aqettal. Sel ɣer-i. Mala texsed ad tilid mliḥ, ḍfer min dac-qqareɣ. Mala wer texsed, aqa a dac-yettwakkes uḍar nniḍen, a dac-yettwakkes ufus, a dac-yettwakkes uzellif… Uca a dd-yawi rebbi wi c-ɣa ifeṣṣlen ula d cekk. »

Ibedd Mimun deg wemkan-nnes. Wer yufi min ɣa yegg. Ineqq-it leḥriq. Ittemraywa, ittawy-it wannay. Yenna-s-dd Buyilem : «Bedd zzat i uḍar-nni n missa i cekk-dd-iwalan, ḥseb tlata n isuraf ɣer deffar. Awarn-as, ḥseb asurif d wezgen x ẓelmeḍ, xbec din, min din ɣa tafed ksi-t-idd. A dd-tdewled ɛawed asurif d wezgen ɣer mani i c-ttuɣa, a tḥesbed asurif d wezgen sennej, min din ɣa tafed ksi-t-idd. Dwel-dd ɛawed ɣer mani i c-ttuɣa, lexdenni ḥseb asurif d wezgen x yeffus. Xbec ɛawed, min din ɣa tafed ksi-t-idd.

Amenni i yegga Mimun. Yexbec ɣer umezwar, yufa dinni leqlem n uɣanim. Wiss tnayen, yufa dinni tadwat. Wis tlata, yufa dinni lluḥ. Yessers-iten x missa mani i iqess rrimet n Mḥemmed. Yerẓem tadwat. Yesseɣḍes deg-s leqlem. Yessufeɣ-it-idd ittudum s ssmeɣ, yura di lluḥ-nni : « Ṭuca ».

Meɣniya, zegga i tesla i tɣuyyit-nni, tedwel-dd. Deg webrid, tettwala ṭṭumubin-nni i di tella rrimet n Ṭuca. Tqerreb ɣer-s, terẓem x-as tawwurt, tewḍa-dd rrimet di tmurt. Yewḍa-dd zeg-s ij n ṭṭezṭim. Teksi-t-idd, treẓm-it, tufa deg-s illa nnekwet. Umi i tt-dd-ɣa testef zi ṭṭeẓṭim, tettebheḍ! Tedwel ɣer deffar s unexliɛ, tenḍer nnekwet-nni am diha. Tufa d nnekwet-nnes nettat i ɣer-s ɣer tenni di ṭṭeẓṭim. Ula d isem, deg-s « Meɣniyya Axerbac ». D wenni d isem-nnes nettat!. Tewta ɣer weqrab nnes, a dd-tejbed nnekwet-nnes nettat, umi i tt-idd-ɣa tekkes, tufa deg-s isem nneɣnit : « Ṭuca Buzembu ». Tettebheḍ ! wer tessin nettat ma d Ṭuca ma d Meɣniyya. Texzer ɣer uṭablu n ṭṭumubin, tettwala dinni ij n udlis d aqdim, yura deg weɣlaf-nnes : « Ṭuca ».

Truḥ, teksi-dd adlis-nni. Terẓem-it, tufa deg-s titeswirin n Buyilem, d tenfas-nnes. D tidet n min das-yemsaren alami yedwel s tembirt-nni. Tennexḍef-dd lexdenni, terẓem maliṭa n ṭṭumubin, tufa dinni ij n ccaqur yeqḍeɛ, ittissiq. Teksi-t-idd, uca tus-dd ɣer wexxam-nni.

Tudef, lla ḥess. Wer tettesli i walu. Tessijj deg yefri-nni mani i yettwaneɣ Mḥemmed. Txarres di tcaqurt i das-yerceg Buyilem deg uzellif. Yeḍra-dd ɣer-s manayenni, uca tedwel ɣer deffar, teɣḍel ij n teqbuct n zzaj, tsur terreẓ. Teqḍeɛ lḥess ma ad tsel i ca n lḥess n tekli, walu. Texzar ɣer yij n teɣmart, tettwala dinni ij n rrwaq. Truḥ ɣer-s, tesleḥm-it s cwaycway, ittban-as-dd weḥfur am uqemmum n tesraft, deg-s ssellum manis i ɣa tehwa. Tseɛɛef ssellum-nni. Umi i ɣa taweḍ ɣer tisi, tettebheḍ! Mɣar iwdan ṣemmren di leḥyuḍ. Ca ixeyyeḍ-as uqemmum, ca inḍew-as uzellif, ca ttwakksen-as iḍaren… texzar, tufa dinni ij n missa d tamezzyant yemmers x-as utilibizyun. Tesserɣ-it, uca a das-dd-iban Mimun ittari di lluḥ: « Ṭuca ». Tesbar cwayt, tettwala-t ittqessas di rrimet n Mḥemmed. Tedwel ɣer deffar, teqqim tettɛuqqa, uca ad tsel i Buyilem d Mimun ssawalen, udfen-dd.. Ttuɣa ffɣen!..

Tedhec, tenḍu ɣer ca n yeḥrucen, uca teffer dinni ixf-nnes. Maca tejja atlibizyun-nni yerɣa. Usin-dd, gguren-dd ɣer mani tella. Yuɣer Buyilem i wetlibizyun yerɣa. Iḥart-dd x tezwict. Yeqqim yesɣuyyu, irezzu x wi din. Ɛlayen ad yaweḍ mani i tella , d nettat a kid-s dd-tengez s ccaqur. Yessexḍa-yas, tyezm-it drus zeg uɣesmir. Truḥ a das-tɛawed, maca yeṭṭef akid-s ccaqur. Txezzar-as deg uyezzim-nni ttehnuccaran-dd zeg-s idammen, amen i kid-s tettemɛutrus ḥuma wer das-ittekkes ccaqur-nni. Ɛlayen a x-as iɣelleb, uca a dd-yadar Mimun aked Buyilem s yij n wuzzal ɣer uzellif. Idewwex-it, uca yeqqim itteddez-as azellif s wuzzal-nni, amen dd-ittfekkar aqessi i ttuɣa ittegg i rrimet n Mḥemmed. Testef Ṭuca (i ttuɣa yellan d Meɣniyya) ixf-nnes, tḥert x tezwict, uca a dd-teqqerqeb x Mimun, tɣeḍl-it dinni x rrimet n Buyilem.

Teẓẓeryeḍ dinni tazwict-nni, tejbed-dd adlis n «Ṭuca» i di tella tenfust d tidet n Buyilem, uca truḥ a das-tkemmel tɣuri!.

Ɣer ɛawed : Mirru ya timersaḍ!

Ɛebdelwaḥed Ḥennuhttps://lerifain.fr/
S tira.. iles yeccat iẓewran...

Amaynu

Tḥajit n Tutiya

Yeqqen ɣer-s