Tamesmunt n « ad nuru i yimyura s Tmaziɣt », iggur ad tegg ijjen wemsagar d aseklan ggin-as i yisem « Mayd nnan idlisen ? » aked umari Cahid Andic x udlis i yura « Irifiyen Ass-a ».
Amsagar-a min xef tbedd tamesmunt-a, iggur ad dag-s innewju Ḥamid TUƐLI i ɣa yeggen ijjen tɣuri deg udlis-a s ixef-nnes, aked twasit n ijewjiwen-nniḍen i ɣa yewcen lxezrat-nnsen deg udlis-a wa i dd-yeffɣen deg usegg°as n 2020.
Tamesmunt n « Ad nuru i yimyura s Tmaziɣt » tettegg tizemmar-nnes maḥend ad tbeda ad tegg ca n imelqiten x tsekla d isental-nniḍen s Tmaziɣt, maḥend ad tessmɣer zeg wuddur n tira n Tmaziɣt.
Amelqi-ya ad yili ass n jjemɛa n 11 Nuwanbir 2022, mani i ɣa yili x tifert n tmesmunt di Facebook.
