26 novembre , 2021

Iknariyen bdan ttemlussunen aked umezruy-nnsen Agwanci Amaziɣ

Iḥenjiren ssemɣaren s tussna Tagwancit Taknarit  Tala: El ganado. Foto: R.S. Aseggas 2018

Imezdaɣ Iknariyen ttemlussunen aked tussna-nnsen n Tmaziɣt. Tameggarut-a azgen ameqqran zzag-s isefeḍ-itt uḥewwes Aspanyu i yekkin xemsa n lqrun. Wami Ispuniya, adu tili n isni n Castille, bdan ttḥewwsen zeg umeggaru n lqern wis xemẓṭac tigzirin Tiknariyin. Tigzirin-a tina ttuɣa-tent zedɣen-tent Igwanciyen, ina d ca n tqebbal d Timaziɣin, aẓur-nnsen zi tefrikt. Imezdaɣ mkabaren aṭṭas maḥend ad nnufslen zeg uḥewwas amaynu i ɣer-sen d-innerzfen. Maca waxxa amenni, rẓin-ten Ikastiyuten deg useggas n 1496. Ispuniyta sekken aṭṭas zeg yinni inejmen ɣer tegzirt Taybirit, ma inni iqqimen di Tinirifi dewlen ttemseddaren aked tudert d ddin amaynu n iḥewwasen. Agdud Aknari, yedwel  yefsi aked iḥewwasen Iwruppawiyen. Luxa aṭṭas zeg Iknariyen tteggen tizemmar maḥend ad awḍen ad afen tawengimt-nnsen iweḍḍren.

Tibridin i zi ttessnen iẓewran-nnsen: DNA d tesnilest

Iknariyen ḍeffren aṭṭas n tussniwin maḥend ad d-ssufɣen Tmaziɣt-nnsen zi tili: Am amezruy, tarkyulujit, tiṭnugrafit d tesnilest tamezruyant. S ifessayen n DNA d trezzutin n tesnilest dewlen ḍeffren tisuraf n lejdud-nnsen Imaziɣen. Alaḥsab tiɣuriwin i dd-yeffɣen n ttyarita, nettaf ajinum-nnsen « génome » yegga acnaw Imẓabiyen niɣ Iseḥrawiyen. Aferdis-a ajini (l’élément génétique) ɛad aqqa-t yeḥḍar deg imezdaɣ n yiḍ-a n tegzirin Tiknariyin. Ula kṭer ɣer temɣarin, minzi Ispuniya i dd-yusin ttuɣa-ten deg wezgen ameqqran-nnsen d irgazen.

Din wi yeqqaren aqqa Igwanciyen usin-dd ɣer tegzirin-a di lqern wis xemsa qbel ma ad dd-ilul ɛisa d beddu umi d-ttban tmasiḥit. Ula kṭer wami wer ufin ca n iceqfan n iɣerruba, nzemmer ad nefhem zi manaya ila axmi kul twalat ttasen-d cwayt zzag-sen ɣer tegzirin-a akked ibeḥriyen Ipunikiyen niɣ Irumaniyen. Tirezzutin timeggura mmlint-idd ila agdud-a ttuɣa wer yeɛlim ca ca n tussna n min iqqnen ɣer ubeḥḥer. S uya, imerzuten qqaren qa ad yili usin-dd aked Irumaniyen, min ittejjan ila abeddel jar tigzirin Tiknaryin ttuɣa yudrus aṭṭas.

Nessen ɛawed ila weyyen-dd akid-sen imudar n tudrin – tiɣaṭin, tixeswin, ilfan, iṭan- akid-s imendi, ibawen d irden. Ttuɣa zeddɣen deg yifran, tteggen tafellaḥt, sseyman wulli.

Timessna n ijjen umezruy yettwattun

Igelliden Igwanciyen

Igwanciyen d Imaziɣen weḥḥd-sen i wer idwilen ca d imeslmen. Taɣerma-nnsen alaḥal kksent-idd Ispunya zeg weẓwar-nnes. Maca waxxa amenni, tejja ca n iceqfan d limart min xef ttɛeqqaben deg iseggusa-ya imeggura. Ufin deg yifran ca n isekkilen ggin ameknaw Tifinaɣ, isekkilen n yiles Amaziɣ.

Awerni i uḥewwes n tegzirin Tiknariyin, tedwel Taspanyut d iles unsib. Waxxa imezdaɣ n teẓra-ya ttuɣa ɣer-sen iles-nnsen. Yettwassen s Tmaziɣt Taknarit. Ismawen n ibilajen, ttekniyat-nnsen, d leɛwayed-nnsen wer zemmren ad ten-fehmen ɣir mala kkin-dd x tussna n Tmaziɣt. Waxxa Tmaziɣt-nnsen tweḍḍer, nettaf ila Taspanyut n Ikanariyen ɛad teḥḍa ca n wawalen ɣer-sen aẓwar d Maziɣ.

Ass-a, Iknariyen dag-sen mezri n twengimt-nnsen ittwattun. Din ij n lxedmet d tameqqrant n trezzut i yexsen ad tɛawed lebni i tnettit-a tadelsant. Mala Tmaziɣt-nnsen tewḍa di tattut, nettaf ila Tmaziɣt-nnsen teqqim deg tegzirt n Tnirifi ar lqern sbeɛṭac, maca di tegzirin nniḍen ippudar tili teqqim ar lqern tseɛṭac.

Abrid n tmessna n yiẓewran n Igwanciyen

Ca n iseggusa zeg wami, tban-dd ij n tutra n tnettit Tamaziɣt, tgeɛɛed aked timessna s tussna n wemkan-a qbel ma ad dd-asen Ispuniya. Asit n Iẓuran ixeddem mliḥ maḥend ad ifser timessna-ya, s twiza aked lxedmet n tmesmunin tidelsanin d trezzutin timassanin i yettxen ad kksent tduli x wagla-ya adelsan n Iknariyen. Tteggen fictat ɛawed deg ibilajen iqdimen, ameknaw n ficta n Beñesmer i yetteggen maḥend ad ssemɣaren tmeyra n tɣuct.

Amaynu

Yeqqen ɣer-s