25 septembre , 2021

Chacha, aẓelmaḍ arifi

Ass n larbeɛ 29 zi yunyu 2016, ɣer tseɛɛet n 16h d 5n tminutin, yemmuti ɣer ujenna  ij n yitri, qqaren-as Chacha. Yiweḍ ɣer yetran nneɣni, ɣer Qeddur, Ameslem, Meɛtub, Izem… itran-a ggin-as araq kid-sen anict !!!

Chacha, yemmut x 61 iseggusa, tudert-nnes yewca-tt i ymeɣban, zi temẓi-nnes yugi s tdiktaturit n Hasan II, uzlen x-as zi tɣuri minzi di tsennawit (iɛdadiya) yugi ad iɣennej i Hassab II deg wakkud-nni. Ddewla n Lmeɣrib tuzzel x-as zi tmurt-nnes.

Chacha d ijjen lla yettwalan merra lehmum umaḍal, d ij uẓelmaḍ maca d ijjen weḥḥed-s !!! d azelmaḍ d arifi, ixezzer ɣer yewdan icemlalen, iberkanen d iwraɣen merra dag-sen idammen d izeggaɣen maca s tiṭṭ d tarifit.

Chacha d ijjen d amaziɣ, d ijjen i yeysin amnus n tira n tmaziɣt zi zik : yeḍfer imsagaren yettwaggen x mamek ɣa nari tamaziɣt deg 1996 di CRB, 1999 di Barsiluna… ; d netta i yeggin axxam usufeɣ n yedlisen (la maison d’édition) « Iẓewran » i dd-issufɣen aṭṭas n yedlisen i yrifiyen yettarin s tmaziɣt di Hulanda ; d netta i yettɣiman d amyaru ameqqran i yuran merra kter zeg imaziɣen merra !!!

Chacha d wenni yeksin amnus akked yewdan nneɣni am Lɛisati : ad ssidfen tamaziɣt deg utlibizyu , yuzzel awerni yewdan maḥend ad isewwar tividyutin zi Amsterdam, Paris, Marseille, Barcelona …

Chacha d ijjen i yeksin amnus n Arif, d netta wer yezmiren ad issiwel 10 n tminutin bla ma ad yini  « ixess-aneɣ ttenḍim irifiyen ».

Timegga n Chacha min mma nenna x-asent ittɣima drus.

Adwal n rrimet n Chacha ɣer tmurt-nnes Arif, ittɣima d ijj usides n tebrat-nnes i yrifiyen maḥend a s-ɣren min yura, ad fehmen min lla (ttuɣa) ixes.

Tirja n Chacha : ad ittwala Arif d alelli, ibedd x iḍaren-nnes i tarwa-nnes s tarwa-nnes.

Tabrat n wedwal n Chacha ɣer tmurt-nnes d iɣess i yettbeddan di tmijja i lmexzen am netta am merra imaziɣen xef yuzzel, yeslaẓ, yesnejla…

Amaynu

Yeqqen ɣer-s