8 décembre , 2021

TEBBUN: Wer ɣer-neɣ ula d ijj n wemxumbel aked Lmerruk

Le Rifain

Deg yijj n wemsawal yegga-t uselway n Lezzayer Ɛebdelmajid TEBBUN aked utilibizyun afransis France 24, yenna belli mala ssiɣen-dd afus Yimerrak, neccin aqqa-neɣ da ḥuma a nessurf imxumbal i yellan jer-aneɣ.

Maca awal-a i yenna TEBBUN, yettu aṭṭas n yisuraf ttuɣa kkin-dd zeg uɣezdis n Lmerruk, ameknaw tabrat n ujellid Muḥemmed wiss setta i das-yessekk deg uyur n dujanbir 2019, ibark-as deg-s umi yedwel d aselway n Lezzayer, ilaɣa-t deg-s ḥuma ad reẓmen ijj n tewwurt d jjdid jer tnayen-a n tmura, tebna x ttiqqet di win jer-asent, d wemsawal i ɣa yebnan ijj n wuɣun yemten jer-asent.

Amen ttuɣa dinni isurifen nniḍen zeg uɣezdis n Lmerruk ḥuma ad nnureẓmen yegmiren, ameknaw min dd-yusin deg yinaw n tekli tazegzawt n 2018, umi i deg-s yessiɣ ujellid n Lmerruk afus n wemsawal, maca Lezzayer yegga ameẓẓuɣ n uḍerḍur aked tsurift-a. S uya, ufuɣ i dd-yegga TEBBUN, d werẓam n yifassen i xef yessawal di lweqt-a, ttemrusan x-as yiseqsan, ma d tidet dinni timexsa ḥuma ad yenfekk wemxumbel? niɣ d axtuttel ḥuma ad yesbeyyen belli Lezzayer wer tt-yuɣi walu aked Lmerruk?

Ttuɣa yizwer i uselway TEBBUN yessiwel deg waṭṭas n wufuɣen-nnes x wemxumbel-a n yegmiren i ibellɛen. Yizwer yenna belli agdud adzayri d wegdud amerruk d awmaten, aṭṭas i ten-itteqqnen ijj aked wenniḍen, maca amxumbel-a n yegmiren yeqqen ɣer weɣḍal n lbaṭel i dd-tegga lḥukuma n Lmerruk x Lezzayer awarn i weẓḍuqqeẓ i yemsaren di Marakec asegg°as n 1994, manaya yejja tateswirt n Lezzayer a teḍfi jer tmura n berra, ɛlaḥsab min yenna TEBBUN.

Abelleɛ n yegmiren jer tnayen-a n tmura, ijeyyef rrawaj i ttuɣa yellan di jjihet n ccerq, kter ɛad umi i yewqeɛ uẓeyyer x sselɛet i dd-itteffɣen s ttrabandu zi Lezzayer. Arẓam n yegmiren, ttwalan-t yimezdaɣ n ccerq belli d ijj tfawt ad terɣ deg wudem n uduqmi i yellan, kter ɛad awarn i lebbla-ya n kuruna.

Amaynu

Tḥajit n Tutiya

Yeqqen ɣer-s