17 octobre , 2021

Ssaɛud ad yerẓem i lɛumra zegga i tt-yesbedd sebɛa n iyuren

Le Rifain

Yegga Ssaɛud bac ad yesmeḥ i yewdan cwayt s cwayt ad reḥen ɣer lɛumara zi 4 kṭuber i dd-yegguren. Manaya ad yili illa i imezdaɣ i yellan di tmurt n Ssaɛud.

Yus-dd usurif-a n werẓam n twura n lɛumra awarn-i umi ttuɣa bellɛen s ssibbet n ubirus n kuruna.

Lwizara n daxxel n tmurt n ssaɛud, tenna deg yijjen ulaɣi-nnes belli arẓam n twura n lɛumra ad yeɛdu zi rebɛa n tsurifin: tamezwarut, zi 4 kṭuber, ad semḥen i yinni i 30% n yinni i yellan di Ssaɛud ɣer daxxel (6000 n yewdan).

Awarn-as s tnayen n simanat, ass n 18 zi kṭuber, ad reẓmen i 75 % n yinni i yellan di Ssaɛud ɣer daxxel abeɛda. A ten-jjen ad raḥen ɣer tmezgida n nnbi di Lmadina, ad ẓẓallen di lḥaramayn…

Zi 1 nuwanbir, ad tebda tsurift wiss tlata. Ad semḥen i yinni i yexsen ad ggen lɛumra zi Ssaɛud niɣ zi dduwal nneɣni i di wer yelli bu lxaṭar n ubirus. Ad awḍen al 100%.

tasurift tameggarut; Ad tili xmi i ɣa yettwaksi lebbla-ya n kuruna. Lexdenni, ad tedwel lɛumra ɣer mamek i ttuɣa-tt.

Ssaɛud ttuɣa tesbedd lɛumra d lḥijj zegga i dd-iban ubirus n Covid-19. Ula d lḥijj ibedd. Yallah 10 000 n lḥujjaj i iḥijjen asegg°as-a. Merra idsen zi daxxel n Ssaɛud. Nnumru-ya d walu mala nesmqudda-t aked ca n tnayen melyun d wezgen n lḥujjaj i iẓuren azzɣat.

Amaynu

Yeqqen ɣer-s