Zzag-sen Messi d Ronaldo.. 10 n imiraren d ta d tameggarut-nnsen deg umundyal.

Lionel Messi d Cristiano Ronaldo d nitni i yeṭṭfen azzreg n tcamma n uḍar i waṭṭas n iseggusa, maca zemmren ad yili d ta twalat-nnsen tameggarut i di ɣa rebḥen tkuppat n umaḍal.

Tnayen-a n imiraren, weyyen merra tiberziwin d tkuppat aked tseḍmiwin-nnsen, maca yalleh weyyen ijjen tkuppat n tmenẓawt aked tseḍmiwin-nnsen tinamurin.

Messi d Ronaldo d ijjen tnayen zeg waṭṭas n imiraren illa zemmren ad tili tkuppat-a n umaḍal i yellan di Qaṭar 2022 d tameggarut-nnsen deg wecrak deg umundyal ; lista n imiraren dag-s :

Cristiano Ronaldo (Purtugal).

Nzemmer a nraja kulci aked ijjen am Ronaldo, maca iggur ad ɣer-s yili 41 n usegg°as di tkuppat n umaḍal i dd-igguren, Itɛin amundyal n Qaṭar wenni d ameggaru-nnes.

Ronaldo ila yenna qbel belli netta wer isbeddi ca tirart-nnes awerni i wemundyal n Qaṭar, inna ila ixes ɛad  ad yirar aked tseḍma n purtugal i « ca n iseggusa-nniḍen »- wi ɣa issnen min ɣa yuqɛen ?

Cristiano Ronaldo.

Imal-nnes wer t-issin ḥedd aked tseḍma-nnes deg wussan-a, zegga yegga ijjen wemsawal mani ikritika Manchester United.

Ronaldo izwar-as iddez azgen ameqqran n nnumrawat di tberziwin n tmura n Uruppa – icrek deg waṭṭas n tberziwin, yirar aṭṭas n partidat, izemmem aṭṭas n igulen – mamec indeh taseḍma n purtugal ad tawi tkuppat asegg°as n 2016.

Aked uyenni, yettwaḥsab zeg imiraren izemmemn aṭṭas n igulen aked tseḍmiwin tinamurin, s ca n 117 n igulen, zzag-sen ijjen uhatrik di tracca n tseḍma Taspanyut di tkuppat n umaḍal tameggarut di Rusiya. 

Amirar-a Apurtugali i yewwḍen 37 n usegg°as, d ijjen zeg imeqqranen n imiraren n tcamma n uḍar deg umezruy, mani izemmem ca n 700 n ugul di tseḍmiwin min ked yirar, yewwya ca n 30 n tberza, yewwya amirar yifen xemsa n twalatin deg umaḍal. Maca d ta twalat tameggarut maḥend ad yerni tkuppat n umaḍal ɣer tebyugrafit-nnes i yeccuren s min yecnin.

Lionel Messi (Arjuntin)

Nzemmer di tidett a dd-nɛawed aṭṭas n tmeslayin min xef nenna x Ronaldo, d neccin nessawal x Messi, i ɣa awḍen 39 n usegg°as di tkuppat n umaḍal i dd-igguren.

Nɣall ad x-as nini ila zeg imiraren imeqqranen deg umaḍal, izemmem 695 n ugul aked Barcelona d Saint Germain, mamec i yewwya amirar yufen deg umaḍal sebɛa n twalatin, wa d ijjen nnumru wer ɣer-s iwwiḍ ula d ijjen umirar deg umezruy, yendeh taseḍma Tarjuntinit ad tawi tkuppat n tmura n umarikan n yeffus (Copa America) di twalat-nnes tameggarut.

Lionel Messi.

Maca mala yewwya tkuppat n umaḍal di Qaṭar izemmer aya ad issers amirar-a aked imeqqranen n tcamma n uḍar aked Pelé d Diego Maradona, i inni i yettwalan belli amirar ixess-as ad yawi amundyal bac ad yili zeg imeqqranen qqaɛ.

Ittirar Messi tcamma n uḍar d netta aqqa-t mliḥ, zegga izemmem 11 n ugul, isenneɛ 14 di 18 n partidat aked Saint Germain.

Yenna Messi, zegga ttyarita, belli tanita i ɣa yilin d taberza tameggarut n tkuppat n umaḍal ɣer-s netta, maca ɛad wer nessin min ɣa yemsaren deg yimal, minzi netta ila iɛewwel qbel ad isbedd tirart-nnes maca yedwel-dd ad yirar aked tseḍma tanamurt.

Robert Lewandowski (Pulanda)

D tanita d twalat tis tnayen i di ɣa yirar itri Apulandi Robert Lewandowski di tkuppat n umaḍal, maca tzemmer ad tili d tameggarut ɛawed.

Robert Lewandoweski

Wer yewwiḍ ca amirar-a min ɣer yella 34 n usegg°as – izemmemn ca n 18 n ugul di 19 n partidat aked Barcelona deg usegg°as-a, ad izmmem ca n ugul deg umundyal n Rusiya i yeffɣen zik zzag-s.

Izemmem itri n Bayern Munich xemsa n igulen di 11 n partidat min ked yirar aked tseḍma n Pulanda di tmeggura n tkuppat n tmura n Uruppa, maca izemmer ad tili d tanita d tameggarut-nnes maḥend ad izemmem di tkuppat n umaḍal.

Neymar (Brazil)

Yettwaḥsab Neymar, 30 n iseggusa, ameẓẓyan-nnsen qqaɛ di llista-ya, maca di tidett inna qa belli tzemmar ad yili amundyal n Qaṭar d ameggaru-nnes.

Itri-ya Abrazili yenna azzɣat : « Ad tili d tameggarut ɣer-i nec. Wer ssineɣ ma ɛad ad ɣar-i ilint tizemmar maḥend ad cerkeɣ ɛad ». Maca awern-as yessiwl-dd yenna ila awal-nnes wer t-fhimen ca mliḥ.

Neymar J.R

Maca qa izemmer ad yendem Neymar – izemmemn 13 n igulen, isenneɛ 11 zzag-sen aked Paris Saint Germain asegg°as-a ; mani iwweḍ ad izemmem ca n 75 n ugul aked tmurt-nnes.

Lwis Swaris (Urugway)

Lwis Swaris ɣer-s 35 n usegg°as, s uya, am imeddukal-nnes di Barcelona, Messi d Neymar- tzemmar ad tili d ta d twalat-nnes tameggarut di tkuppat n umaḍal.

Amsugi n Liverpool d Barcelona d Ateltico Madrid, illa idwel ɣer tseḍma-nnes tamezwarut Nationale mani i kid-s iwwi lliga n Urugway.

Luis Suarez

Ad yili Swaris ɛad ittfekker-dd wami das-wcin tarxita tazegg°aɣt di tkuppat n umaḍal, wami issufeɣ s ufus-nnes tcamma, yugi ad yejj Gana ad teɛda ɣer uzgen n umeggaru n tkuppat n umaḍal asegg°as n 2010, ɛawed wami izɛef Georgio Chiellini di tkuppat n umaḍal asegg°as n 2014. 

Maci ḥa yitri-ya di tseḍma n Urugway i yegguren ad ikemmel tikli-nnes, nzemmer a dd-neydar ula Edinson Cavani, min ɣer yella 35 n usegg°as, d Diego Godin i ɣer yella 36 n usegg°as ɛawed.

Luka Mudrič (Krwatiya)

Itri n Real Madrid, Luka Mudrič, ɣer-s 37 n usegg°as, d ta i ɣa yilin tis tmenya zi tmeccarctin-nnes aked tseḍma n Krwatiya. Ineqqisen qqarnen ila iggur ad isbedd tirart tamaḍlant awerni i tkuppat n umaḍal, waxxa anemhal-nnes iqqar illa iggur ad isiɣa ad yirar ɛad.

Luka Mudtrič

Yirar Mudrič ijjen tilalt d tameqqrant maḥend ad issiweḍ taseḍma n tmurt-nnes ɣer umeggaru n umundyal n usegg°as n 2018, illa xesren kunṭra i Fransa.

Iwwi Mudrič x tsemɣurt n tcamma n wureɣ i umirar yifen di tberza, mamec yewwya tasemɣurt n umirar yifen deg umaḍal.

Karim Benzemma (Fransa)

Amirar-a n Real Madrid iggur ad ikemmel asegg°as-nnes wis xemsa utlatin zegga i ɣa tsala partida tameggarut deg umundyal.

Icerrek Benzemma di tberza-ya zegga yewwya amirar yifen deg umaḍal deg usegg°as n 2022, awerni umi izemmem 44 n ugul zi 46 n partida, waxxa wer izemmem ḥa xemsa n igulen asegg°as-a.

D ta d twalat tis tnayen i di ɣa icrek deg umundyal awerni 2014. Ssigg°jen-t x lista n tseḍma n Fransa asegg°as-a n 2010, zi senni wer yeḥḍir di 2018, zegga i t-ssigg°jen ca n setta n iseggusa zegga icrek deg ijjen ddusi n aɛeffan.

Karim Benzemma

Gareth Bale (Wilz)

D ta d twalat tameggarut i di ɣa icrek itri n Wilez, Gareth Bale, di tmeggura n tkuppat n umaḍal – tzemmar ad tili ta d tmeggarut-nnes ɛawed.

Yenna umirar-a iwwḍen 33 n usegg°as, ila wer ixes ca ad isbedd tirart-nnes awerni i umundyal n Qaṭar, maca iggur ad yaweḍ 37 n usegg°as di tkuppat n umaḍal i dd-igguren.

Yudef Bale aked tseḍma n Los Angeles Amarikani, deg unebdu i yeɛdan, zegga tsala kunṭra-nnes aked Real Madrid. Nnan ca n ineqqisen ila Bale ttuɣa yegga ad isbedd tirart-nnes tamaḍlant mli taseḍma n Wilz wer tgeɛɛed ca ɣer tkuppat n umaḍal.

Gareth Bale

Manuel Neuer (Aliman)

yettwaḥsab Itri n Bayern Munich d tseḍma n Uliman, Manuel Neuer ijjen zeg imeḥḍayen n tracca isebḥanen di tsatalt-nnes.

Yewwi Neuer tkuppat n umaḍal aseggas n 2014, ttuɣa-t zeg imiraren isebḥanen.

Iggur ad yaweḍ Neuer 40 n usegg°as deg umundyal n 2026. Setta n ipurtiruten iraren deg umundyal zegga ɛdan lɛumur-a, ula d netta izemmer ad tt-yegg.

Neuer

Sergio Busquets (Spaniya).

Yettwaḥsab Busquets ijjen zeg imiraren imeqqranen di ɛicrin iseggusa-ya tameggarut, ttuɣa yettɛawan imeddukal-nnes di Barcelona d tseḍma n Spaniya maḥend ad mmutyen ad sugen mani netta ittɣima ɣer deffer ittqarmar tcamma.

Maca lux netta ɣer-s 34 n usegg°as, wer iqqim amec i t-ttuɣa.

Iqqseḥ zi ssa d usawen a nẓer wenn iwwiyen tkuppat n umaḍal asegg°as n 2010 ad dd-iban twalat-nneɣni deg umundyal, ijjen rebɛa n iseggusa zi lux.

Amaynu

Yeqqen ɣer-s