Le Rifain
Ibelleɛ Sadio Mané x yexf-nnes zegga i yessen belli ilqef-it ubirus n kuruna.
Yusa-dd manaya awarn i tlata n wussan zeggami tenna terfiqt n Liverpool n čamma n uḍar belli Thiago Alcantara ula d netta ilqef-it ubirus.
Tenna terfiqt n Liverpool aqa Sadio Mané banent-idd x-as ttebcayar n kuruna, maca sseḥḥet-nnes aqqa-tt mliḥ.
yirar Sadio Mané (28 n iseggusa) letnayen i yeɛdun di tfust n čamma i di terna terfiqt-nnes s 3-1. Maca wer yirar ca ass n lexmis di tfust i di terna Liverpool s pinaltiyat.
Yenna Mané di leḥsab-nnes di twitter: « Awarn i umi xaf-i dd-rrin, ilqef-ayi nican ubirus n Covid-19. Maca xseɣ a dawem-iniɣ belli aqqa-yi mliḥ, wer din bu ca n lxaṭar ». Yerni Mané yenna di tzemmemt-nnes: « Bac ad tḥawlem x sseḥḥet-nwem d sseḥḥet n wi yellan-nwem, weqqrem iprutukulen n sseḥḥet arendad i ubirus-a ».
Tenna Liverpool deg usit-nnes aqa ad siɣn ttweqqren iprutukulen n sseḥḥet arendad i lehlak n kuruna. Tenna aqa Sadio Mané ad yeqqim yeḥjeb al ɣa yili mliḥ.
