Aṭṭas n imiraren ittiraren deg Uruppa kkin-d zi Arrif. Ijjen uzgen zzag-sen ttagin ad iraren aked kippu n Lmuɣrib. Ttexsen ad iraren di tmurt mani i dd-iyman, din i dd-lulen. Amecaw Brahim Afellay d Xalid Buleḥruz aked Hulanda. Munir Lḥeddadi aked Spanya. Niɣ ura Tariq Lyunsi aked Nnurwij. Tlata zeg imiraren-a tuɣa izzaren-asen ksin bandu n Tmaziɣt. Ijjen ḥajet d tameccarcut jar imiraren i yeksin bnadu n Tmaziɣt, s merra ugin ad iraren aked kippu Ameɣrabi. Ad yili d ict tebrat zeg imiraren, qqaren dag-s ila nitni wer ttun ca mani i dd-lulen.
Brahim Afellay d amezwaru
Aked itran n Barcelona, ameknaw Missi, Piki, Puyul, Inyista, Tcavis d inniḍen yeksi Brahim Afellay bandu n Tmaziɣt. Manaya iddakk°al ɣer usegg°as n 2011 deg unfarar n Tcampyens Lig. Afellay ig ixḍaren ad yirar aked Hulanda di 2007. Iwweḍ aked Ilicciniyen ar unfarar n kuppa tamaḍlant di 2010.
Tariq Lyunsi: Ad yeddar Arrif !
Twalat tamezwarut i di ɣa yeksi Tariq Lyunsi bandu n Tmaziɣt di 2014. Tariq ig ittiraren netta d umas Muḥemmed di kippu n Nirwij akid-sen tnayen n imiraren nniḍen d Irifiyen, nitni d Haytam Lɛiṣami d Ɛumar Lɛebdlawi. Deg usegg°as n 2018, deg ijjen partida aked Belgarya rebɛa n imiraren-a ruḥen ɣer mani llan ca n Irifiyen tccejjaɛen-ten bdan kessin s tɣuyyit: « ad yeddar Arrif ». Manaya tuɣa-t d twiza zzag-sen aked mayen tuɣa ittemsaren di Arrif.
Munir Lḥeddadi: wer ittili ca d ameggaru zzag-sen
Munir Lḥeddadi, Arifi ig ittiraren aked Sevilla irebḥen kuntṛa i Inter Milan di lliga Tawrappawit s 3 n iɣulen ɣer 2. Di ficta i di ttuɣa kessin imiraren ibanduten n tmurt-nnsen. Ixḍar mmis n Arrif, Lḥeddadi ad yeksi banu n Tmaziɣt. Munir tuɣa la d netta izzar-as yugi ad yirar aked kippu n Lmuɣrib, ixḍar ad yirar aked Spanya.
Ɣar ɛawed: Elmundo tura x ubandu n Tmaziɣt i yeksi Munir Lḥeddadi
