LeRifain
Tekkes tmeqqrant n tmurt n New Zealand Jacinda Ardern deg wawal, bac ad tesmutti istayen (lintixabat) i ttuɣa ittxessan ad ttwaggent zeg wass n 19 zi cutanbir al 17 zi kṭuber i dd-yegguren. Manaya tegga-t lmujet n jjdid n ubirus n kuruna i yesɣumbaren i tmurt n Zilanda n jjdid.
Tenna Jacinda Ardern: « Asurif-a izemmar bac ad yewc lweqt i qeɛ ikabaren (l’aḥzab) bac ad ggen ddiɛaya i yestayen. Amen itticc lweqt i tyemmunt n yestayen bac ad tessewjed i min dd-yegguren ».
Tameqqrant n ukabar n Ixeddamen (Ẓelmeḍ n lwesṭ), wer tufi illa ad tesmutti istayen awarn i umi ikabaren smuttyen ddiɛaya i ttuɣa tteggen i yestayen, s ssibbet n ubirus i dd-iɛeqben ɣer tmurt-a i ttuɣa yeṭṭfen ixf-nnes, ttuɣa sskanen-dd ɣer-s s ufus di min tegga n ḥeṭṭu zeg ubirus n Covid-19.
Lmexzen n Zilanda n Jjdid, ibelleɛ tamdint n Auckland, i yellan d ijjten zi tneddam timeqqranin di tmurt-a. Al ass n lḥedd, abirus yeḍher-dd di 49 n yewdan, zegga i ɛdun 100 n wussan zeggami wer dd-ibin ula d ijjen yehlek s ubirus-a.
Tala: France 24
