Deg wass n ttlata i yeɛdan 13/10/2020 yemsar ijjen umḥizwar d amaḍlan deg usalun n tmsmunt tameqqrant n tseqqar n yewdan , carcent day-s 47 n tmura bac ad bḍan rekrasa x xemsa n grupput, zay-sent : 13 n tmura zeg Wasiya d ilel i yersin. 13 n tmura zi Tefrikt, setta n tmura zeg yeffus n Europa, sebεa n tmura zi zermeḍ n Europa d tmenya ṯmura d Tilatiniyin d lebḥer Akaraybi.
Inni umi yectab rkursi wyent: Ssinigal, Bulivia, Kutdivwar, Lgabun, Malawi, Miksiku, Ccinwa, Fransa, Britaniya, Amarikan, Irlanda n s-nnej. Timura-ya ad menɛent rekrasa-nsent di Yennayer n usegg°as i d-yusin. Bac a tawi ca n tmurt rkursi ittxissa ad tettawi tnayen n tsqqar zi 3 ( 2/3 ) zi timura timecrac n ddunect (193), ittsemma zi 128 ibuntwen s-nnej.
Deg Wasiya: Ccinwa i ttuɣa i d-yewwyen 180 ibuntwen di 2016 rexxu amura tiwi-d 139, Saɛudiya war das-ictib ca, tiwi-d 90 ibuntwen maca maɣar ? Ad yiri d tamennawt n Jamal Xacuqji. X manaya yura umeqqran n wegraw » Human Rights Watch » mass Bruno Stagno di twiter: « Aseqqim n izerfan n yewdan ass-a iɛaren-as i min xef tarzzu i Ssaɛudiya azyen ameqqran n tmura timecrac ḥazen Ssaεudiya ɣar ṭṭaref deg wakud-a i di tt-isseggura Muḥmmed n Selman ».
Yenna abɛda ijjen umeqqran n « Human Rights Watch » mass Louis Charbonneau di twiter: « Yarxirat niɣ umi texser Ssaɛudiya, maca pitan umi d-uryent ccinwa d Kuba d Arrusya, maca maɛlic, aseqqim-nni day-s cway n tfawt ».
Mamec tenna ɛawd massa Sarah Leah Whitson tameqqrant n wegraw adimukraṭi n umaḍal aserɣan ( DAWN) : « Muḥmmed n Selman yewwi-tt-id deg ixef-nnes, issehwa-as ccan i ttuɣa ɣar-s i Ssaɛudiya deg umaḍal, waxxa i yexser lemlayer bac ad iscen ijjenn waẓri war ɣar-s yedjin » .
