Le Rifain
Ibedd arayes n Lubnan Michel Naïm Aoun x uḍar-nnes bac ad yessen min yemsaren nican alami yeḍḍuqqeẓ lmers ameqqran i yellan di lwesṭ n Bayrut. Ula d asɣim n lwuzara ayenni ma yiweḍ ixebbec bac ad yessen min iweqɛen.
Yenna Michel Aoun zegga i iruḥ ɣer wemkan i yeḍḍuqqẓen: « Aṭebheḍ d tiqqest n wul zi min yemsaren, wer daneɣ-itteṭṭef ca ḥuma ad nessiweḍ tabrat i twacunin n ccuhada d yinni ig iyezmen, d merra ilubnaniyen, belli neccin aqqa-neɣ deg webrid, a negg lankiṭ, al ɣa naweḍ ɣer tidet n uḍuqqeẓ-a i yemsaren, i yenɣin aberru n yewdan, i iyezmen ɛawed aberru n yewdan. Inni i ɣer yella ufus di manaya, lexber-nsen d aneggar ».
Arayes n Lubnan yeqqim aked imeqqranen n lpulis d lɛesker n Lubnan, yesḥess i min das-nnan x uḍuqqeẓ-a i yemsaren di lwesṭ n Bayrut, amen yeḍfer isuraf n lankiṭ mani iwḍen.
Deg webrid n wawal x manaya, yegga wesɣim n lwuzara ijjen tɣimit di leqser n Baɛabda assa n larbeɛ 5 zi ɣuct, ḥuma ad mherwaḍen di min dd-yusin deg wesɣim yuɛlan n uḥami, ad ḍefren ɛawed min dd-yegguren awarn i ɣezzu-ya i yemsaren di Bayrut.
Amen i dd-yusa deg utlilibizyun n ljazira ass-a, ɛlaḥsab min dasen-dd-yessiweḍ ureqqas i ɣer-sen di Bayrut, belli mmya n yewdan i umi yeffeɣ buḥbel zegga yemsar uḍuqqeẓ-a, amen yezmen ca n rebɛalaf, d waṭṭas i yufin ixf-nsen bla tazeddiɣt.
Arayes n tɣiwant n Bayrut Jamal Ɛitani, yenna i Reuters zegga i yeẓra min yemsaren, bella amkan-a am ca n wemkan yewqeɛ deg-s wemsiqḍi, yerni yella billi wer izemmar ad yessiwel!
Ɛitani yerni yenna belli min yemsaren d ɣeẓẓu d ameqqran i Bayrut d Lubnan amen tekmel. Din taxessart n waṭṭas n imilyaren n idularen.
Amen dd-yusa x yiles n lewzir n tdemsa d tsebbabt di Lubnan, deg wawal-nnes i yenna i Reuters, belli ijjen wemkan mani i ttuɣa xeznen irden, yiweḍ-it uḍuqqeẓ. lexxu ɣer-sen min ɣa ɣasṭaren qell i yijjen uyur. a ten-ixess irden.
Tamesqadt n Umarikan di Bayrut, zeg uɣezdis-nnes ula d nettat, deg yijjen tebrat tessewc-itt i imezdaɣ n Bayrut, bac ad awyen ḥadur, ad ggen tikumam, ad qqimen di tudrin-nsen, bac ad ḥḍan ixf-nsen zi lgaz aɛeffan i dd-yeffɣen aked uḍuqqeẓ i yemsaren.
Deg yijjen ulaɣi-nnes, tettwessa tmesqadt n Umarikan imirikaniyen bac ad agg°jen x wemkan n uḍuqqeẓ.
Tala: Reuters + aljazeera
