Le Rifain
Sylvain, a dd-tekked Fransa amen tekmel, wer tettifed ca n yijjen yegga tiggaz di rrimet-nnes anict n min yegga netta. Ɛlaḥal wer yejji bu ca n temkant texwa di rrimet-nnes wer tt-yercim. Alami ula d iles-nnes yegga deg-s tiggaz. Yegga ijjen uparasyun di Swisra, lebḥer acemlal n tiṭṭawin-nnes yerra-t d aberkan. Minzi aparasyun am wa wer t-ttejjin a t-yegg di Fransa.
Al da, wer din ula d ijj n wemxumbel. Maca aterras-a, d amselmed di sekwila, deg ubilaj i umi qqaren Palaiseau, i dd-yusin zzat i Paris. yessɣara iḥenjiren imeẓẓyanen n setta n isegg°usa. Yekka ḥiḍɛac n isegg°usa di lxedmet-a.
Yebda wemxumbel, umi i zeg-s cetkan ca n ibabaten n iḥenjiren i yessɣara. Baba-s d yemma-s n yijjen uḥenjir d ameẓẓyan ttuɣa yeqqar ɣer wemselmed-a, cetkan zeg-s, awarn i umi yedwel mmi-tsen itthardef s llilet, yeṭṭara-dd ɣer-s Sylvain di lemnam.
Lwizara n uselmed tesbedd-it zi lxedmet. Maca netta yenna belli ittxessa ad xzaren ɣer lxedmet-nnes walli ɣer cckel-nnes.
Yenna Sylvain belli imeḥḍaren ittxessa-ten tnayen n tminutin uca a kid-s nnamen. ibabaten ijjen yumayen. d amxumbel n lweqt waha. Yenna belli manaya yegga-t, minzi ittexs tiggaz, tteɛjibent-as. Yerni yenna ɛawed belli ttuɣa wer ɣer-s bu ca n yemxumbal aṭṭas alami i yesberken tiṭṭawin.
Ibabaten d tyemmatin n imeḥḍaren, dinni wi dd-yusin kunṭra i wemselmed-a, dinni ɛawed wi yennan belli am netta am yewdan merra, wer din bu wemxumbel.
