Ɛebdessamad Zaryuḥi:
Lxecbet n tamɣart i ila ɣer yella 77 n issegusa tettwaf di taddart-nnes ɣer tmeddit n 13 ktuber 2021, di temdint um qqaren Agde i yudsen Montpellier. Nann pulisiyya ila tamsart-a wer teqqin ca ɣer tmegga n tirurist.
Di tmeddit n larbeɛ ɣer 22h, ruḥen ipulisen ɣer taddart n temɣart-a. Mmis imsawaḍ aked plulisiyya minzi wer ittesli i lḥes-ness.
Nurmal ila mmis issawal mkul ass aked yemas di ttilifun. Mmis igga kamera i zi yettwala taddart n yemmas. Umi ixzer di tliviziun yerra taynit ila tɛiccewt n jjerda texxartel aṭṭas, ɛawed axmi yettwala ca n taddut di tmurt. Umi yeẓra manaya inexleɛ uca yegga ttilifun s tazzla i pulisiyya, Pulisiyya nnan‑as ila ufin azellif-nnes x ijjen ttabla ṭṭerf i arimet yemmersen x tmurt. Nnan ɛawed wer ufin ca limart n iceffarn i ittadfen x tudrin. Leqwar n taddart ila ibelleɛ, maca tawwurt n zzat ufin-tt terẓem.
Pulisiyya ayenni mani yewḍen tteggen tarezzut ḥuma ad ssnen min imsaren nican.
