8 décembre , 2021

🎤 Timura n tmunt n Uruppa iwḍent ɣer wemsetfaq s 750 milyar n wurut bac ad qḍant x min tegga kuruna

Audio

Le Rifain

Iwḍen yimeqqranen n tmunt n tmura n Uruppa ɣer yijjen wemsetfaq bac ad qḍan x later n jjriḥect n « Covid-19 ».

Amsetfaq-a yiweḍ ɣer werḍal d umerwas lqimet-nnes 750 milyar n wurut ḥuma ad kksen ddqel x 27 n tmura n Uruppa i yenḍuren s kuruna.

Amsetfaq-a i yekkin rebɛa n llyali n wemsawal, ttuɣa deg-s amsebḍi jer tmura i yeccin tikti di kuruna, d tmura i ittwalan belli lqimet n tenɛacin-a temɣar aṭṭas.

D wa d amsetfaq ameqqran deg umezruy n tmunt n tmura n Uruppa x ca n umerwas icerken. Charles Michel, rrayes n wemsagar-a, yenna belli tasersiwt-a d ijjen n lḥajet temɣar i Uruppa.

Asurif-a mmersent deg-s tiṭṭawin x tmura i yeccin tikti s lebbla-ya n kuruna, timura-ya a dasent-yemmewc umerwas s lqimet n 390 milyar n wurut. deg umezwaru-nsent, dinni tamurt n Uṭalyan d tmurt n Useppanyu, d tina i umi dd-ɣa tekker tesɣart tameqqrant.

Amsagar-a i yebdan aɛecci n wass n jjemɛa, yekka kter zi 90 n tseɛɛatin n wemherwaḍ. Yedwel d wa d agraw azegrar, zeg wegraw n Nis di Fraansa i yettwaggen asegg°as n 2000.

Lexxu, min ɣer iwḍen ammu, yeqqim-as ad yeɛdu x yifassen n uberlaman Awruppi ḥuma a x-as iwafeq.

Mamek i ggin iwḍen ɣer wemsetfaq?

yefser Charles Michel, arrayes n wesɣim Awruppi, ijjen n tzemmemt di twitter deg-s ijjen wawal waha: « ssefqet ». manaya awarn i umi iwḍen ɣer wemsetfaq ass n ttlata ɣer 15:15 s wakud n Greenwich.

Amsagar i yebdan aɛecci n jjemɛa, ttuɣa dinni amseksi deg wemherwaḍ i iweqɛen. Timura n Hulanda d Nnemsa d Ddanemark d Ssuwid i yeqqaren x yexf-nsent belli nitenti d timura sxinectirant, ttuɣa ugint bac ad tettwawc 500 milyar n wurut i tmura i yenḍurren aṭṭas s kuruna.

Tarbiɛt-a n tmura, ineddeh-itent Mark Rutte, i yellan d ameqqran n yineɣlafen n Hulanda, nnan belli timura-ya i yenḍurren a dasent-newc 375 milyar n wurut mala aṭṭas.

Maca ca n tarbiɛt nneɣnit, ameknaw tamurt n Useppanyu d tmurt n Uṭalyan, nnan belli mala walu, ittxessa tamɛawant wer dd-thekk°i x 400 milyar n wurut.

Deg yijjen lleqṭa, Arayes n Fransa Emmanuel Macron yewta s udubbiz di missa, yenna belli tarbiɛt i yessawalen s yisem n rebɛa n tmura i yesxinectiran, xsen ad awyen Uruppa ɣer lxaṭar.

Tawlaft: dpa

Macron yessers-asen-dd lqimet n 390 milyar n wurut, nnumru-ya wafqent x-as ɣer umeggar rebɛa-nni n tmura i ttuɣa yugin, awarn i umi wcin awal bac cwayt zi tenɛacin-a a dd-yedwel ɣer usenḍuq n tmunt n Uruppa.

Zi min dd-yemmersen ɛawed deg wemherwaḍ n wegraw-a, mamek ɣa ttwaserrfent tenɛacin-a, amen lḥukumat ad weqqrent lqanun. Timura n Hangarya d Pulanda huddent bac ad agint x wemsetfaq mala ttuɣa deg-s belli ttmenyat wer ttwasarfent ca x tmura i wer yegguren ca aked ca n tebridin n tdimuqratit.

Aked uɣezdis n manaya, ttuɣa dinni ijjen wemsetfaq deg wegraw-a x ttmenyat n tmunt n Uruppa n sebɛa n yisegg°usa i dd-yegguren, ttmenyat-a ttawḍent ɣer 1,1 trilyun n wurut.

Min nnan yimeqqranen n tmunt n Uruppa?

Yenna Arrayes n Fransa Emmanuel Macron belli ass-a d ijjen wass ad yadef deg umezruy n Uruppa.

Tameqqrant n yineɣlafen n tmurt n Biljik, Sophie Wilmès, tenna deg yijjen tzemmemt di twiter, belli ɛemmers ma yemsar qbel i wass-a, bac tamunt n Uruppa ad tewwet leḥsab i yimal.

Charles Michel yenna: « nesban-dd tamunit-nneɣ d twiza-nneɣ, amen dd-nesbana belli neccin nettamen belli imal-nneɣ d ijjen ».

Ursula von der Leyen, tenna deg yijjen tzemmemt: « negga ass-a ijjen usurif ad yadef amezruy, ittxessa merra a daneɣ-yeɛjeb lḥal s manaya, maca ttrajan-aneɣ ɛad yisuraf nniḍen, zeg-sen aberlaman Awruppi i daneɣ ɣa iwafqen x wemsetfaq-a ».

Ameqqran n yineɣlafen n Hulanda, Mark Rutte, i ttuɣa ineddhen timura i yesxinectiran, ireḥḥeb s wemsetfaq, maca yessiwel x min yemsaren n wemseksi deg wemherwaḍ. yenna: neccin merra nessen min nettegg, nzemmar a neksi lebɛaḍ n tiyyita.

Ɛebdelwaḥed Ḥennuhttps://lerifain.fr/
S tira.. iles yeccat iẓewran...

Amaynu

Tḥajit n Tutiya

Yeqqen ɣer-s