Yeffeɣ-dd nnhar n yiḍa Benkiran s yij n tebrat yefser-itt x leḥsab-nnes di facebook, yekɛa deg-s zegga i yeɛdu lqanun n lkif deg wesɣim n lḥukuma.
Tabrat i yura s ufus deg yij n lkiɣeḍ d acemlal, deg-s afirmar-nnes, yeqqar deg-s: « necc i da ifirmaren swadday, Ɛebdilah Benkiran, bab n nnekwet nnumru A130989, qqareɣ belli zegga i yeɛdu lqanun n lkif deg wesɣim n lḥukuma ass n 11/03/2021, necc aqa kkseɣ-tt aked yewdan-a ina: Seɛdeddin Lɛutmani, Musṭafa Rrmid, Leḥsen Ddawdi, Ɛebdleɛziz Rrebbaḥ, d Muḥemmed amekraz »
Yerni Benkiran yenna di tebrat-nnes: « Necc aqa sbeddeɣ anhezzi-inu deg ukabar n PJD, d manaya i dawem-ɣa iniɣ ».
Lḥukuma n lmuɣrib ttuɣa tesseɛdu ass-a lqanun nnumru 13.21 i yeqqnen ɣer usexdem n lkif s lqanun.
Ipijidiyen i yellan di lwizara wer nhezzen, wer nnin walu, waxxa akabar-nsen ttuɣa yeffeɣ-dd s yij usemmal (bayan) yeqqar deg-s belli lqanun-a ɛad ittxessa-t wemharwaḍ, d wemcawar.
Tabrat-a n Benkiran terẓem ij n tewwurt n ugarnez deg iraqen n wemsawaḍ anamun, x mamek i tt-yura, d tira i das-yegga, d lkiɣeḍ i di tt-yura, d ufirmar i das-yegga.
