5 décembre , 2021

CHACHA, Adrar n tussna i wer ittmettin!

Le Rifain

CHACHA. ⵛⴰⵛⴰ
Ilul di Qabuyawa (Ixf n Cebdan), yixḍar ad yerwel zi tmurt-nnes mamek i ggin waṭṭas n yirifiyen, awarn i umi x-as uzzlen zi tɣuri, (Asinan n Ccrif Muḥemmed Amẓẓyan). Minzi umi ttuɣa-t d aḥudri, ttuɣa ittwassen s wenhezzi-nnes d weɣnas-nnes, ttuɣa-t d ijj zeg yimeɣnasen n « Ɣer zzat » (ila l’amam). Min yejjin lmexzen n Lmerruk ittmunistar-it.
Di 1977, yeɛreq ɣer tmurt n Hulanda, dinn i yufa ixf-nnes, yufa tilelli-nnes. Min t-yejjin a dd-yezḍuqqez min deg-s yufsen di tira d tmuzikt d yezlan…
Yura CHACHA kter zi 20 n yidlisen jer usefru d tullisin d wungal. zeg-sen: « Rez ṭṭabu a dd-teffeɣ tfukt », « Ajḍiḍ umi yettwagg celwaw », « Cway zi tibbuhelya ɛad wer tiwid », « tarwa n umaḍal », « Abrid ɣer yezran »….
CHACHA ittwassen s tewdanit-nnes (tafganit) d ubeddi-nnes aked uɣezdis n yinni i umi ttwakksent tseqqar. Yennewju ɣer waṭṭaṣ n tmura di Uruppa d Umarikan n yeffus n Tefriqt.
Ttuɣa deg-s ijj n lehlak yeqseḥ, maca waxxa amenni, wer yessehwi ifassen-nnes, waxxa amenni yeqqim lebda isnejbad ɣer wesbeddi n tsekla-nnes d tdelsa-nnes tarifit…
Ass n 29 yunyu 2016, yeffeɣ buḥbel amezdag n CHACHA awarn i umuɣẓel d azegrar aked lehlak.
Yemḍel di tmeḍlin n « Yixf n Cebdan » ass n 3 yulyuz 2016, yejjull al umi yeṛẓa ṭṭabu, umi udfent temɣarin aked yergazen i twala tamezwarut ad t-meḍlent. munen-dd x umḍel-nnes aṭṭaṣ n yimeɣnasen zi mkul amkan. CHACHA yessigg°ed lmexzen umi ttuɣa yedder, yessigg°ed-it ula amen yemmut!…
Ad yedder yiman-nnek deg wefra ay argaz! Wer c-nettettu…

Ɣer ɛawed: Musṭafa LBUƐEZZATI (Amesrem); tacumɛet n wesfirnen i tessexsi temnawt

Ɛebdelwaḥed Ḥennuhttps://lerifain.fr/
S tira.. iles yeccat iẓewran...

Amaynu

Yeqqen ɣer-s