Tateswirt: BBC
Le Rifain
Yenna uneɣlaf n berra n tmurt n Briṭanya Dominic Raab belli tamurt n Arusya tettɣawal ɣer tukkerḍa n ca trezzut x bakuna i ubirus n Kuruna.
Dominic Raab yessken s uḍaḍ ɣer Arusya belli texs ad treddej ijjen wemɛawan d amaḍlan i uṭewwer n bakuna n ubirus-a, amen yenna deg wawal-nnes belli » Arusya wer ten-yecqi walu bla tazzla ɣer rrbeḥ ».
Amesqad n Arusya di tmurt n Briṭanya yenker min dd-yusin x yiles n Dominic Raab, yenna deg yijjen wemsawal aked BBC belli tḥajit-a i nnan x tmurt-nnes wer das-tt-ikessi leɛqel, wer ɣer-s ula d ijjen lmeɛna.
Amesqad n Arusya yenker ɛawed deg wawal-nnes belli tamurt-nnes ttuɣa ɣer-s afus deg yestayen (lintixabat) n Briṭanya asegg°as i yeɛdun, s ca n lekwaɣeḍ (amen x-as nnan) wḍan-as-dd deg ufus s usexdem n ca n tebridin wer llint d tinni!
Lmexzen n Kanada d Umarikan d Briṭanya sseknen s ufus ass n lexmis i yeɛdun ɣer yijjen tegrawt qqaren-as « ABT 29 » texs ad tpiraṭa ca n tzemmar ttwaggent deg uṭewwer n bakuna n « Covid 19 », nnan belli tagrawt-a ɣer-s ifilan aked lmuxabart n Arusya.
Tala n lexber: BBC
