Di Talsint, di llisi n Lxawarizmi, di texxamt i di yessɣara uselmad n tfelsaft, yegga dinni ijj n texzant yesmun dag-s ca n 200 n yedlisen n tfelsaft, amen yesselseq di leḥyuḍ n texxamt n teɣri aṭṭas n tteswirin n ifelsafen d imussnawen i yewcin aṭṭas i tewdanit.
Aselmad, ttuɣa ittexs a dd-yerr nnefs n tɣuri d trezzut deg imeḥḍaren, deg wakud i di yessdel ubusar d umarḍen, tembubes tsegnut n tiwecca i yessullsen, zegga i xerwḍen yifassen n tsertit igar n uselmed, jjin abrid-nnes wer ibin, wer yessufuɣ mani yeffuk ad yessufeɣ…
Maca deg yij n tuffut, yudef-dd uselmad ɣer texxamt n teɣri di llisi mani yessɣara, yufa ccebbak n tburjet yenneqleɛ, yufa idlisen wer din llin, jjin-as dinni illa ij n wedlis n lɛaqida n tmeslemt. qeccren-as-dd titeswirin n imussnawen d ifelsafen zi leḥyuḍ, skemḍen kulci deg wazzerg n llisi.
Asekmeḍ-a n yedlisen n tfelsaft, itterra-neɣ ɣer waṭṭas n temsarin deg umezruy, mani i ttsugan yewdan x tussna d tmessna, mani ttexsen ad terna tallest tifawin. Netterra-dd tasfift n Daɛic d min skemḍen d idlisen di lɛiraq d Surya, d Inaziyen d min skemḍen d idlisen n tussna deg uliman, minzi ttuɣa ttexsen ad idum ij n weklasi n tussna waha deg Uliman, uca skemḍen min wer dd-ittisen aked uxarres-nsen. d iqectalen i yeskemḍen idlisen n yemselmen deg wandalus, d waɛraben i yeskemḍen idlisen n ifirɛawnen d yedlisen n imaziɣen, d imaɣulen i yeskemḍen idlisen n « bayt lḥikma » di lɛahd n Harun rracid, nedren iɣged-nsen deg yeɣzar n Dijla, d Jules César i yeskemḍen tinidlisen n Teskandarit di Misra… Min wer tecci tmessi, swiẓẓḍen ɣer-s ifassen n tukkerḍa d uḍeyyeɛ…
a dd-nedwel ɣer min yemsaren di Talsint, d ij n lḥajet wer tehwin ca. Wi ibedden awarn i ɣezzu-ya n usekmeḍ n yedlisen d usugi x tfelsaft? Mayemmi i skemḍen kulci idlisen i din, jjin ijjen n lɛaqida n tmeslemt? Man tabrat i xsen ad ssiwḍen s manayenni? Iseqsiten ttɣiman uglen…
Wer nettettu ca a nini aqa ijerdamiyen ruḥen ar dinni, ggin lankiṭ ad xzaren wi yeggin manayenni. Deg uraji bac a dd-iban wi ibedden x ɣezzu-ya, tettmerni Talsint ɣer tsersiwin n usugi x tussna d tmesna, s usekmeḍ n yedlisen.
