17 octobre , 2021

AMDH tessken s uḍaḍ ɣer ddḥas n imehlak n covid 19 di spiṭar n Nnaḍur, tettlaɣa bac ad yennurẓem spiṭar n Ddriwec.

Deg yij n tebrat tessekk-itt tmesmunt tameɣrabit i tseqqar n yewdan (AMDH), ayyaw n Nnaḍur, ɣer lwizara n sseḥḥet di Arbaṭ, tettetter deg-s tacḍaḍt tameqqarsut zi lwizara i dd-yessewcen s umeẓẓuɣ aḍehcur ɣer ilaɣiten n imezdaɣ n tesga n Ddriwec ḥuma ad yennurẓem seppiṭar, ad ikumasa lxedmet.

Tabrat-a i tesqad tmesmunt ass n 23 zi ɣuct 2021, nnumru-nnes: 16/2021, tenna deg-s aqa waxxa spiṭar n Ddriwec yebna, ifinar, ijehhez, waxxa ttwaɛeyynen yewdan i deg-s ɣa ixedmen, ɛad sseccan awal, ugin ad wcen tfawt tazegzawt ḥuma ad yerẓem tiwura-nnes, ad yebda lxedmet.

Manaya, ɛlaḥsab min dd-yusin di tebrat; ittejja aṭṭas n imezdaɣ n Nnaḍur d Ddriwec, ittraḥ-asen lḥeqq-nsen di trezzut x ugenfi, deg wussan-a i di dd-yebbeɛbeɛ lehlak n kuruna.

Ddḥas i yellan di spiṭar n Lḥasani di Nnaḍur, lesbab-nnes; -ɛlaḥsab tabrat n AMDH- ttasen-dd ɣer-s imehlak n covid zi Ddriwec d Nnaḍur, s manaya, ttcarent deɣya qamat, ttɣiman aṭṭas n yewdan wer ttifen bu imukan di spiṭar, kter ɛad inni i wer ɣer yelli ca, wer yelli minzi ɣa azzlen d minzi ɣa mmuttyen.

Teqqar tmesmunt tameɣrabit n tseqqar n yewdan di Nnaḍur, di tebrat-nnes; aqa arendad i weqqan n twura n spiṭar n Ddriwec, d weqqan n imeẓẓuɣen x ilaɣiten n imezdaɣ d tmesmunin, nesfekkara-kenniw s taqsuḥi d lxaṭar n mani yeggur manaya, nettetter zeg-wem amur nniḍen bac ad treẓmem deɣya spiṭar n Ddriwec, bac ad yemmeksi cwayt umeḥḥen i ittekken x imezdaɣ, ad yefses ɛawed ddḥas i yellan x spiṭar n Nnaḍur.

Ɛebdelwaḥed Ḥennuhttps://lerifain.fr/
S tira.. iles yeccat iẓewran...

Amaynu

Yeqqen ɣer-s