Zegga teɛdu sett chur zeg wami tefser tnegmamt n ṣeḥhet lḥal n uɣawel deg umaḍal, ggin agraw wis rebɛa ass-a maḥend ad ssnen mani iwweḍ ubirus n Kuruna. Ula kter awarni umi ibda ittgeɛɛad s waṭṭas nnumru n imehlak n Kuruna zegga ttyarita. Deg Uliman nettaf ila asinag n Robert-Koch yenna ila imehlak n Kuruna wwḍen 870 deg wass-a (01/08/2020). Di Lmuɣrib, wwḍen imehlak deg wass s ixef-nnes ar 1063.
Aṭṭas n tmura kritikan tanegmamt n ṣeḥḥet minzi ɛeḍlen aṭṭas wer ggin tizemmar-nnsen maḥend ad fesren x lḥal n uɣawel di Ccinwa d umaḍal. Amarikan, yenna x tnegmamt belli nettat d tmunyakut deg ufus n Ccinwa, mamec i tt-tekritikan alaḥsab takmamt, minzi kul twalat d mayen teqqar x tekmamt.
Tedros: Kuruna, ad yeqqim later-nnes deg issgusa i dd-igguren.
Yenna Tedros Adhanom Ghebreyesus amɣar n tnagmamt n ṣeḥḥet tamaḍlant deg wass n jjemɛa (31 yulyuz 2020) belli afsar n ubirus n kuruna ad yili zeg ikaṭastrufen ɣa yeqqimen ijjen lweqt d azegrar deg yimal.
Awal-nnes yenna-t deg ijjen wegraw di tnegmamt, mamec yenna ɛawed Tedros ila aqqa: « jjriḥect-a d ijjen krisis tettemsar ijjen twalat kul lqern maca tyuri-nnes nzemmer ad zzag-s naka x waṭṭas n issgusa ».
Tedros yenna, qa waxxa nessen cwayt x ubirus-a wa, maca qa din aṭṭas n iseqsan ɛad wer dasen-nufi timrarutin, ɛad zemmren iwdan ad helken s lehlak-a wa. Yeḍfar yenna « tiɣuriwin i negga mmalent-id ila waxxa abirus-a illqef aṭṭas n yiwdan di ca n tmurt, maca waxxa amenni izemmer ad d-yedwel ad ten-ilqef ɛawed »
Yerni yenna : » Aṭṭas n tmura tuɣa ttɣilent belli ssurfent lxaṭar, maca luxa nettaf-itent tteggent tizemmar maḥend wer dd-ttbinen ibeqqiḍen d imaynuten n ubirus-a. D ca n tmura i tuɣa yeẓrin drus n iwdan ihelken s ubrius, luxa ttmarnayen dag-sent imehlak d imettinen »
Tigg°edi zi leḥmu n Uruppa
Zeg ijjen uɣezdis nniḍen. Uruppa deg ussan-a imeggura, igeɛɛed dag-s leḥmu s waṭṭas, iweḍ ar 40° di ca n imukan. Mayen yejjin lmexzen n mkul tammurt ad sfekkren imsaryen ig ittraḥen ɣer lebḥer belli abirus ɛad yella.
Tenna Fransa ila tasfift n leḥmu yeggur ad taweḍ ar 40° di tili, deg imukan ameknaw Paris d ijjen wezgen zeg yeẓẓlmeḍ-nnes i yewtin ɣer usammer. Ifransisen nnan belli ixess iwdan « ad siɣan ad mlagg°ajen jar-asen ad ggen takmamt ». Mamec nnan ila ixess ad rren taynit i iwssura.
Aliman la d netta, ibda issadaf drus n yiwdan ɣer timedwin-nnes n waman mani qbel tuɣa ssadafen iwdan kulci. Ibriṭaniyen d Ilimaniyen fesren-dd ila ass-a n jjemɛa (01 zi Tɣuct 2020) d ass i yeḥman qaɛ ar lexxu, maca aqqa tasfift n leḥmu, lmijar-nnes d aquḍaḍ. I dd-wekkden.
