Le Rifain
Yenna Ḥmed Zzefzafi, baba-s n Naser Zzefzafi deg yijjen live, belli inekraf isertanen n Arif tettekk x-asen di leḥbusat, Kksen x macca lexxu kter zi 18 n wussan zeggami. Zeg-sen Naser d Nabil Aḥemjiq di lḥebs n Ras Lma di Fas, Lḥaki d Aḍehcur, 13 n wussan n tikkest x macca di lḥebs n Gersif, Aked uɣezdis n Bilal Ahebbaḍ d Ahennuc di lḥebs n Selwan. Dinni ɛawed Samir Iɣid, yudef ula d netta di tikkest x macca 8 n wussan zeggami.
Yenna Ḥmed Zzefzafi belli inekraf-a i yudfen di tikkest x macca, d ijjen lɛar x ddewla bac ad isiɣi manaya.
Yerni yenna: Tarwa-nneɣ kksen-asen tilelli-nsen, lexxu xsen a dasen-kksen tudert-nsen.
Deg yijjen tebrat i yinni i dd-ihekk°an x Ɛizi Ḥmed, yenna-sen: Mmi aqqa-t di lḥebs wtin-t s 20 n isegg°usa, yekkes x macca 18 n wussan zeggami, kenniw teqqarem-ayi sqar! Necc qqareɣ-awem: xmi ɣa ttwaṭṭfen tarwa-nwem, a ten-wten s 20 n isegg°usa, lexdenni sqarem.
Zzefzafi, yenna belli tarwa-nsen wer ggin walu, marra imeɣrabiyen ssnen belli ttwaḍelmen. yenna belli merra inekraf ittxessa-ten a ten-smunen di Selwan bac ad ilin udsen ɣer twacunin-nsen.
Yenna Ḥmed Zzefzafi belli Amina Buɛeyyac ittxessa-tt ad tegg lxedmet-nnes, niɣ tessen illa ad tini aqa ina wer llin ca d inekraf isertanen?
