8 décembre , 2021

Tayemra s lmaynat (ddinamit).. Xmi iyemmaren neqqen lebḥer n Arrif

tala: Abalhernews

Tayemra s ddinamit niɣ s lmaynat, amek i das-neqqar di Arrif. D ijjen marka n tyemra ittagi x-as lqanun. Maca waxxa amenni llan aṭṭas n yiwdan i tt-itteggen minzi xminni yemmren s lmaynat ittehwin x-asen ad jemɛen iselman. Tameslayt-ta tanita taεeffant tneqq asistim aykuluji n lebḥer. Iḍuqquzen ig illitin s lmaynat ttarddajen lmurjan i zi tetten iselman, uca ttraḥen ttenqisen niɣ ttmettan.
Lmaynat di ca n imukan deg umaḍal sxeddamen dag-s ca n tzeyyatin, tteggen dag-sent: Tinitratin n lputasyum, tinitratin n lamunyum d uxelleṭ n lkirusin… Ddegg-a n lmaynat zemmrent ad nɣent ula d ineymaren i tent-sxedmen. Rni x-as tuɛɛeffna i tteggent lmaynat-a x usisitim aykuluji n lebḥer.

Lmaynat di Arrif

Deg wayur n may di 2019. Aṭṭas n ixeddamen deg yiger n tyemra sɣuyyen x ineymaren-nni ig iyemmaren s ddinamit. Nnan belli ijjen uɣerrabu d ameẓẓyan izemmer ad yeymar s ddinamit ar 3000 n uṣenduq n iselmaden. Mani Tinniḍni i wer isxeddiment ca lmaynat yallah ttakk°aḍent ɣer rebɛin n isenduqen. Ddegg-a n tyemra bla lqanun, tejja ineymaren ad sxedmen tebridt- minzi treẓẓem ikercicen-nnsen ɣer rrbeḥ. Ina tettun ila neqqen zzag-s agla n iselman di lebḥer. Dewlen aṭṭas n iselman ttenqiṣen aṭṭas, mani neqqen imukan mani i d-ttasen iselman ad ccen macca-nnsen. Abarru n ineymaren di Nnaḍur d Biyya ccetkan s tyemra ittilin jar Ayt Sɛid d Temsaman (tasga n Ddriwec). Qqaren belli d ineymaren-a ig isxeddamen di tyemra-nnsen lmaynat. Deg usegg°as n 2015, ijjen uḥenjir zi Temsaman wwḍent ca n iceqfan n lmaynat min yejjin imeddukal-nnes ad t-awyen ɣer spiṭar n Biyya deɣya.
Aṭṭas n imussnawen qqaren ila iselman ittwaymren s ddinamit d iɛeffanen i sseḥḥet n bnadem. Minzi aslem-nni ittili aysum-nnes ittwacarreg.

tala: Altpress

Manis i dd-ttawin lmaynat?

Dini tnayen n tebridin i zi ittawyen ineymaren lmaynat, icten d tenni i zi dd-ssaɣen zeg inni itteggen lmaynat deg ikaryaren. Din ict tebridt nniḍen, xminni i tt-ttawyen x webrid n ttrabandu zi Mritc, maca tanita d tuqlilt. Minzi lmexzen ittẓeyyer mliḥ sselɛt i d-itteffɣen zi Mlilet. Asexdem n lmaynat d aqdim di Arrif, weyyen-t-id Ispunya d amezwaru, uca siɣan x-as tarwa n Arrif.

Ineymaren ccaten tfawt di lebḥer ttnejmaεen-d xas iselman uca neṭṭaren x-asen lmaynat, s manaya i zi neqqen iselman. Waxxa aṭṭas n ineymarne sɣuyyen x ddegg-a n lexdayem tiɛeffanin i neqqen tawennaḍt n lebḥer di Arrif. Maca waxxa amenni imḍebbaren wer ggin bu ca n tzemmar d timeqqranin maḥend ad qḍan x tyemra-ya ittḍarran amdan d lebḥer. Rni x manaya, anaw-a n tyemra yella s waṭṭas di Ddzayar d Libiya, izemmer zi ssa d usawen ad yeqḍa x wagla n iselman n lebḥer acemlal.

ɣer ɛawed: Mikro‑plastik, Tiyarjin tisemmaḍin!

Amaynu

Tḥajit n Tutiya

Yeqqen ɣer-s