8 décembre , 2021

Ma s tidet iggur ad yemsar ca n tsunami di Arrif?

Aṭṭas n ineqqisen (rapports) nnan-d ila ippudar ad yuqeɛ ca n tsunami x jjihet n lebḥar acemlal. S uya izemmer tsunami-ya ad iwwet tineddam n Arrif. Ɛali Cerrud, i yellan d amussnaw deg uklima, yenna i Hespress, ila qa merra ineqqisen qqaren ila ippudar ad yuqeɛ tsunami di lebḥar acemlal. Manaya ssawalent x-as aṭṭas n tnewcayin (données) d timassanin.

Zi tnewcayin-a min xef issiwel Cerrud deg wawal-nnes aked Hespress min isemma s « tajyu-dinamit n tmurt d unhezzi n tfelwin-nnes ». Yeqqar ila « Manaya iqqen ɣer teflewt n yeẓẓlmeḍ. Jar kṭer tenni Taybirit d teflewt Tafrikant i yellan deg yeffus. Jar-asent din tizzit n Asuriya, mamec din taflewt n uṭlantik i yellan adu lebḥer. Da nessawal x lebḥer n Alduru i yesmunan Arrif d yeffus n Spaniya ».

Cerrud immel-d ila « Tizza-ya aqqa-tent jar Lmeɣrib d Legzayer, ttakkwaḍent ar Tunes deg yeffus. Deg yeẓẓlmeḍ aqqa-tent ɛawed zi Spaniya d yeffus n Fransa ar Iṭaliya d Tturk ».

Amussnaw-a n uklima inna ila « Amkan mani ttilint tizza-ya ittili dag-sent unhezzi n tmurt s waṭṭas, minzi ittuqiɛ din umladas n tfelwin n wafrika d uruppa s ca n isuntimitren kul aseggas ».

Anhezzi n tmurt i yemsaren deg Imzuren deg useggas n 2004.

Mamec i dd-inna « ila din tizzit n Ljebha, Nnkur d Bumerdas. Merra tina d tizza ɣer-sent amkan di lebḥar acemlal, ttessnent ijjen unhezzi lebda ».

Aked manaya, inna Cerrud aqqa anhezzi n tfelwin-a d umladas-nni ittuqiɛen jar-asent ittaru-dd ijjen uɛebbeẓ d inirji d ameqqran deg imukan-a. Izemmer ad aneɣ-yegg inhezziyen n tmurt. Anhezzi-a ittakk°aḍ ar imukan i yellan x tma n tizza-ya, zzag-sen Arrif.

Cerrud yessiwel-dd x ijjen tmeslayt nniḍen i yzemmren ad tt-tegg tsunami, da nessawal x « leḥmu i ɣa issiliyen zeg waman n lebḥer minzi ideflawen iggur ad fesyen di tsenyant n yeffus d tenni taẓelmaḍt ».

Inna « aqqa merra manaya, ad aneɣ-dd-issaru lemwaj i yuɛlan, aked unhezzi n tmurt i daneɣ ɣa yeggen Tusnami ». Mamec iwekked ila aqqa tigzirin i ɣa yeccen aɛumd aṭṭas zi manaya, ameknaw tigzirin n Mallorca, Menorca, Ibiza d Corsica.

Tizza n Nnkur Zzat i Biyya d Temsaman.

Yessiwel-dd x Arrif, yenna belli idurar n Arrif uɛlan s uya iggur ad ḥḍan cwayt zi tsunami-ya, maca imukan i yehwan ad ccen aɛmud ».

Ijjen tɣuri ttuɣa yegg-itt useqqim i yuɛlan Aspanyu n trezzutin timassain (CSIC) ila lebḥer n Lboran i yellan jar Ibiriya d Arrif, izemmer ad yegg aṭṭas n lemwaj n Tsunami.

Amaynu

Tḥajit n Tutiya

Yeqqen ɣer-s