Σebdellah Yuεla, ijjen zi tarwa n Arrif i yixḍaren ad yefret s yilem-nnes deg ussan n lḥirak n Arrif zegga tuɣa x-as rezzun ad ittwaṭṭef. Tazeddiɣt-nnes di Spanya, wer tejji ca taynit i yettic i umezruy n Arrif ad texsi. Iqqim amenni irezzu, ittbeqqac deg umezruy n Arrif i yudsen.
Deg wass n 21 Γuct, ifsar-dd Yuεla x Facebook-nnes, belli yufa ijjen temḍelt di temcant umi qqaren Valdés, di ẓelmeḍ n Spanya. Tamḍelt-a yettwaggen asegg°as n 1936 aked beddu n girra Taspanyut.
Tamḍelt-nni, mala walu tili dag-s jar 400 d 500 n wemḍel, alaḥsab mayen yenna umrezzu, zeg Irifiyen ittwappulsen. Dag-s ula Irifiyen umi neqqar « Arrigularis ». Niɣ ipulisen i tuɣa ixeddmen aked Spanya. Abarru n Irifiyen i yemmuten di garra-nni. Ijjen zzag-sen, yenna-dd deg ijjen ukumunṭir belli jedd-s yettwamḍel di temḍelt-nni.
Yuɛla, yenna εawed ila netta qa issujad ijjen ḍussi x temḍelt, ad ixzar larcif Aspanyu mayen x-as iqqar. Ad immelqa ula aked iwdan itterran taynit i tmkettit n temdint n Valdés.
