Asit n Goud.ma Amuɣrabi, yura ijjen artikel x ifassen i ɣer-s ɣer Limarat di Lmuɣrib. Yewwi-d lexbar n twasit n Amɣar n Dubay umi qqaren Al Maktum. Alaḥsab asit-a wa, yeqqar belli twasit n uterras-a ig itteḥkamen di tmurt-nnes, maci amenni waha. Yus-d ḥma ad isegged mayen ismunan tammurt-nnes aked Lmuɣrib. Minzi tnayen-a n tmura wer qqiment ca mliḥ jar-asent qbala.
Yemsar wadaf n Limarat ɣer Lmuɣrib maḥned ad sbedden PJD min ked tettbedda Qaṭar d Turkiya. Minzi iPJDawiyen ttwaḥsaben x « Lixwan ». Qaṭar nettat mani mma tettwala ca n ijjen zi lixwan tettbedda akid-s. Ad nebda zeg Imasriyen ar Ilibiyen yiḍ-a ig ittmenɣan aked Ḥeftar.
Limarat wer tbedd bu ɣer manayenni waha, maca aṭṭas n ineɣmasen, qqaren ila tesɣa ula d aɣemmis n Hespress. Asit-a min ɣer ttadfen aṭṭas n yiwdan maḥend ad ssnen lexbar n tmurt-nnsen. Mamec tbedd aked PAM kunṭra i PJD.
Qaṭar wer teqqim ca txezzer di Limarat waha. Maca la d nettat teḍleq i leflus maḥend ad tseɣ iẓelmaḍen iqawmiyen d ixwanjiyen zzag-sen PJD. Merra manaya maḥend ad ɣer-s yili wemkan-nnes deg wazzareg amuɣrabi. Lmuɣrib ttuɣa ixes ad iṭṭef qabu zi lweṣṭ, maca manaya wer das-icci ca. Imaratiyen d Isaεudiyen tettren zi Lmuɣrib ad kid-sen yili aked uɣezdis-nnes, maca yettrakk°al-asen. Ar danita, aṭṭas n yiwdan tettren zi ddewla-nnsen ad teqḍeɛ aked Ixaljiyen qqaε, minzi wer zzag-sen ẓrin ɣir mayen yellan d aɛeffan. Maca apiṭrul d teneɛacin sderɣalent tiṭṭawin.
