5 décembre , 2021

Ha mamec ɣa tegged ad tebḍid jar arrwaḥ d Kuruna

tala : Alhurra

Msebḍan izumal n Kuruna zi bnadem ɣer wenniḍen, jar timessi, tusut i yuẓɣen, tiqqest uzellif, aɣufi d izumal nniḍen. Maca tettwagg ijjen tɣuri tenna belli zemmren izumal-a ad ilin s ijjen usettef. Mayen ɣa iɛawnen ɣer ugenfi n lehlak-a, d aya i yenna ijjen uneqqis tegg-it-id CBS Tamarikant.

Imerzuten, i yeggin tarezzut-a di tesdawit n yeffus n Kalifurniya, fsaren-tt deg ijjen tesɣunt qqaren-as « Frontiers in Public Health ». Bedden di tɣuri-nnsen x ddwaṣa n ca n 55 alef n imehlak s Kuruna di Ccinwa.

Xenni, ufin belli asettef n izumal n lehlak n Kuruna netta d wa: Timessi, tusut d uhellek n ddat, anṣar niɣ trarit d ubeṛṛuḍ.

Tɣuri teqqar qa maci merra imehlak ttasen-asen-dd izumal-a s yixef-nnsen. Maca aqqa asettef-a izemmer ad iɛawen ḥuma ad nefrez lehlak-a x lehlakat nniḍen yettwassnen.

Ɛawed, aqqa timessi d tusut qqnen ɣer waṭṭas n lehlakat nniḍen, ameknaw arrwaḥ. Maca aqqa abani-nnsen aked izumal n uberruḍ d uɛeddis i yuzzlen d manaya i ttejjan abirus-a iban.

D manaya ig inna uduktur Peter Kuhn, i yellan d amerzu di tesdawit n Kalifurniya, maḥend ad nebḍa arrwaḥ i yellan nurmal aked Kuruna abirus. Jarkter ila wer iqqim walu ad nadef lexrif i di ittili arrwaḥ s waṭṭas.

Alaḥsab mayen tenna France Presse, lehlak n Kuruna yiwweḍ ad yelqef 20.9 melyun n yiwdan deg umaḍal. Mmuten zzag-s 754649 n yiwdan ar lux.

Tala: Alhurra

Amaynu

Yeqqen ɣer-s